Qeqertarsuup Tunuani umiatsiaararsortut 94 tonsinik suli qaleralittassaqarput
Qeqertarsuup Tunuani umiatsiaararsortut qaleralinnik pisassiissutigineqarsimasunit suli aalisarneqarsimanngitsunik 94 tonsinik pisassaqartinneqartut, KNR paasissutissanik tamatumunnga tunngasunik ilisimatinneqarpoq.
Aalisarsinnaanermut Akuersissutinik Nakkutilliisoqarfik juulip 25-ani nalunaarpoq Qeqertarsuup Tunuani sinerissap qanittuani umiatsiaaqqamik qaleralinniarneq juulip 28-ani unitsinneqassasoq, pisassat taamani tamakkerneqartussanngormata.
Nakkutilliisoqarfillu erseqqissaavoq tunisineq kingulleq tassaasoq juulip 28-at.
Aalisarnermut Akuersissutinik Nakkutilliisoqarfiup pisortaa Mads Trolle Nedergaard KNR-mut ilisimatitsivoq 94 tonsit decembarimi aalisarneqartussatut isumaliuutaasimasoq. Erseqqissaavorlu pisassiissutaasimasunit sinneruttut aalisartinneqarumaartut ukiup sinnerani aalisarneq pillugu aaqqiissutissarsisoqareerpat.
- Suleqatigiissitaqarpoq ukiup sinnerani aalisarnissamut tunngasumik nalilersuisumik aaqqiissuteqarniartussamillu, Mads Trolle Nedergaard oqarpoq.