Qeqertarsuup tunuani qaleralittat amerlerialaartut
Qeqertarsuup tunuani qaleralinniat 2016-imi aalisarluarput, qaleraliimmi 10.000 tonsit ukioq taanna tulaanneqarput. 2017-imili tulaassat procentinik 40-nik ikileriarput.
Tamannalu aalisartut tupaallaatigisimavaat.
- Ilumoorpoq siorna kinguarujorujussuarami taassuma tupatsippaatigut annertuumik, Niels-Kristian Vetterlain oqarpoq.
Ukioq mannali tunisat siornamut taamaalineranut sanilliullugu 900 tonsinik amerleriarput. Peqqutaasinnaasullu arlaqarsinnaasut Ilulissani Qaleralinniat Piniartullu Peqatigiiffianni siulittaasoq isumaqarpoq.
- Kisianni ersarittoq una oqaatigerusuppara ukiup sikuani aalisarneq qaffariarujussuarsinnaasutut oqaatigineqarsinnaasut ilagivaat. Tassami ukiup sikuani aalisarput ukioq manna maaji ilanngullugu. Sukkasuumillu qalluineq taanna pivoq ukiup siulii eqqarsaatigalugit.
Sarfap kissarnerunera pisuusimasinnaasoq
Sarfallu kissartup nalliusimaarnera siorna aamma qaleralikilliorneranut pissutaasutut aalisartunit tunngavilersuutigineqartarpoq. Ukioq mannalumi aamma saarulliit ukiut siuliinut sanilliullugit pisariuminaatsinneqarnerusimapput.
- Imaassinnaavoq aamma tamakkua nalaakkigut. Kingumut utersaartut. Taamaattumik saarulliit appariartulerput. Pingaartumik maani Ilulissat eqqaani. Aalisaatinilluunniit kiiumanngitsut massakkut oqaatiginiarneqarput. Taamaammat aamma naatsorsuutigaara sarfaq kissartoq illuariartortoq allamut.
Ukiuni kingullerni qalerallit tulaassat.
Ukioq mannalu qaleralinnik tulaassinerunermi aamma ammassaat nalaanni qalluinerusimaneq neqitassarissaarnerunerlu peqqutaaqataasinnaasoq ilimagineqarpoq.
- Taamaammat immaqa tassuuna malunniussinnaavoq. Soorunami tamakkiisumik suna malunniutaasinnaasoq oqaatigisinnaanngikkaluarparput ersareqqinnaamik. Kisianni taakkua naatsorsuutigaagut peqqutaaqataasimasinnaasut, Niels-Kristian Vetterlain oqarpoq.
Aalisapilunneq pisuusoq
Ilulissanut qalerallit tulaanneqartut ukiut sisamat kingumut qiviarlugit amerlanerpaangamik 2015-imi piffissap imaalinerani 5.600 tonsit tulaanneqarput.
Qeqertarsuup tunuani sinerissap qanittuani qaleralinniarneq siorna procentinik 40-nik ikinnerusunik tulaassiffiuvoq. Aalisakkat tulaanneqartut ikileriarnerinut aalisapilunneq pissutaasinnaasoq Pinngortitaleriffiup nalilerpaa.
Aalisagartassiissutit ukiuni arlalinni biologinit innersuunneqartuniit amerlanerusarput, aalisakkallu tulaanneqartartut ukiuni kingullerni qulini millingaluttuinnartut Pinngortileriffimmit misissuisoqarnerani paasinarsivoq.
