Qeqertarsuatsiaarmiut rubiinisiorfissamut isumalluarput

True North Gemsip Qeqertarsuatsiaat eqqaanni rubiinisiorfissami aatsitassanik piiaanissamut atatillugu pilersaarutaa Naalakkersuisut tallimanngormat akueraat. Naalakkersuisut akuersinerat nunaqarfimmiunut suliffissanik amerlanngikkaluanik qulakkeerinnissammat isumallualersitsisoq Qeqertarsuatsiaani nunaqarfimmi aqutsisut siulittaasuat Jonathan Jakobsen oqarpoq.
Allattoq Thora H. Nielsen
juunip 02-at 2014 16:48

- Akuersissuteqarnikkut nunaqarfimmut pitsaasumik, tassalu ukiup annerpaartaani suliffissaqartitsisinnaammat neriulluaatigaarput, Jonathan Jakobsen oqarpoq.

Qeqertarsuatsiaani innuttaasut 200-t sinnilaarlugit amerlassuseqarput. Piiaavimmut kiffartuussisussat piiaavimmilu sulisussat kiisalu piareersarneqarnerani sulisussat eqqarsaatigalugit Qeqertarsuatsiaaninngaannit inuit 10-t 15-illu akornanni sulisinnaanissaat naatsorsuutigalugu Jonathan Jakobsen oqarpoq.

Aamma isumaqarpoq rubiinisiornissamik ukiut siuliini pilersaarusiortarnerit, misissuisarnerit misissugassanillu nassiussuisarnerit eqqarsaatigalugit nioqqutissiornissap aallartinneqarnissaa pisariaqalersoq. Taamatuttaaq ilinniartunik qulinik tigusisinnaanissamut tunngasoq isumaqatigiissummi ilanngunneqarsimammat iluarisimaarnerarpaa.

Rubiinisiorfissap ukiuni arfineq-pingasuni ingerlasinnaanissaa neriuutigineqarpoq, nassaaqqittoqassappallu ukiut 15-it angullugit piiaasoqarsinnaanissaa ilimagineqarluni. Taamaattumik siunissamut isumalluarnerarput:

- Neriuppunga rubiinisiorfik maanimiunut nunatsinnullu siunissami ilinniarfiullunilu pissarsiffiussasoq, aningaasatigut teknikkikkullu ineriartorneq eqqarsaatigalugit paasisaqarfiullunilu ingerlanneqarumaartoq, Jonathan Jakobsen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq