Qeqertarsuatsiaani qulimiguullit pujoralatsitseqaat
Nunaqarfik qeqertamiippoq qaqqajunnallu qaani qulimiguulik miffissaqartaraluarluni. Tikikkaangalli nunaqarfiup qeqqaniittoq arsaattarfik mittarfittut atorneqartarpoq. Kingunerisarpaa arsaattarfiup eqqaaniittut tamarmik pujoralassuarmik anersaartulertarnerat. Nunaqarfimmiut ilaat utoqqaat illuani aamma sulisoq taama oqaluttuarpoq.
- Ippassaq-aasiit tujormivugut. Qulimiguullip tikinnerata sioqqat pujoralaallu teqqaatitai errortanut aneertunullu assut ajoqutaasarput. Utoqqaat illuanni ineqartunut aamma assut ajoqutaasarpoq, arnaq atia aaqqissuisoqarfimmi ilisimasarput oqaluttuarpoq.
Utoqqaat ineqarfiat "Utoqqallak" arsaattarfiup eqqannguaniippoq.
- Qulimiguullit ulloq qanoq iligaluallarpat meqattaalillaraangata, soorlu aatsitassarsiortoqalersillugu, pingaartumik nipersua utoqqarnut eqqissisimajunnaarutaasarpoq. Pujoralassuarlu pillugu qimarnuttariaqartarpavut. Errortat pujoralaannanngortarmata aamma erroqqittariaqartarpavut, sulisut oqarput.
Qeqertarsuatsiaarmiut soorunami ajoriffissaqartinngilaat arlaannik pisoqartillugu - soorlu inuunermut navianarsinnaasumik pisoqartillugu -arsaattarfiup mittarfittut atorneqarsinnaasarnera.
- Kisianni ujarassiortut-aasiit uteqattaalerpara tujorminassaaq. Arlaannik iliortoqartariaqarpoq, nunaqarfimmiut oqarput.
Nunaqarfimmiut siunnersuutigaat nunaqarfiup iluanut minnatik allamut narsaamanertamut, soorlu nunaqarfiup kujataaniittumut amutsiviup nalaanut.