Qeqertarsuarmiut Avannaata Qimussersuanut peqataaqqissinnaalertut
Kalaallit Nunaanni Qimussertartut Kattuffiat, Ilulissani sapaatit akunnerata siuliani ataatsimeersuarpoq. Ataatsimeersuarnermi aalajangikkanut arlalinnut ilaasoq tassaavoq, Qeqertarsuarmiut kattuffiup aaqqissuussaanut tamanut, assersuutigalugu Avannaata Qimussersuanut peqataasinnaanngoqqinnerat.
Tamanna KNQK-mi siulittaasunngortumit nuannaarutaavoq.
- Oqiliallannartorujussuuvoq taamaalilluni Qeqertarsuarmiut ilaasortatut allatuulli pisinnaatitaaffeqarlutik aaqqissuuttakkatsinnut peqataaleqqittussanngornerat taanna uanga nuannaarutigeqaara, Mikkel Jeremiassen, KNR-mut oqarpoq.
AAMMA ATUARUK Qeqertarsuarmi qimussertartut peqatigiiffiat: Peqataaqqusaannginnerput akuerisinnaanngilarput
Tassalu suliami nutaanik paasisaqartoqanngikkaluartoq taama aalajangertoqarpoq.
Suliaq 2018-mi aallartippoq. Qeqertarsuarmi qimmilik kalaallit qimmerinngisaannik akusanik eqqussisimasutut taamani pasillerneqarpoq. Taamatullu pisoqarsimanera DNA atorlugu misissuinikkut 2019 naalersoq naqissuserneqarpoq.
Qeqertarsuarmiut talitik quleraat
Qeqertarsuarmiut namminneq siunnersuutaat, tassa unammersuarnerni peqataasinnaaleqqinnissaq ataatsimeersuarnermi amerlanerussutilinnit akuerineqarpoq.
Tamannalu peqatigiiffiup Qimusseq-82-p siulittaasuanit, ukiuni kingullerni suliat eqqaallugit killitsisimaarutaavoq.
- Misigissutsinik nassataqarnikuuvoq, qimmigut maani ilaatigut unnuaannakkut naalliutsinneqarlutik toqunneqartarnikuugamik, taamaattumik misigissusertalerujuulluni tungaanut pissanganikuugatta taamaattumik nuannaartorujorujorujorujorujuuvugut angusatsinnik, imaannaanngilaq angusarput, Simigaq Heilmann oqarpoq.
Suliaq ilungersunartoq
Kattuffimmut siulittaasunngortoq, Mikkel Jeremiassen, kattuffiup 1998-imi aallartinneranit siulersuisuunernut ilaajuartarpoq, ukiunilu arlalinni siulittaasuusarluni.
Qimmillu akusaasimanerannut suliaq, siulersuisuunernut akuunermini ilungersunarnerpaanut ilaasoq oqarpoq.
- Suliaq imaannaasimanngilaq. Suliaq oqittuunngilaq kialuunniit takusinnaavaa, aamma tungaviusimasoq qimussertartut kattuffiannilu tunngavigineqartuartussaq issittup qimmiata illersornissaa uummateqarfigalugu ukiorpassuarni taanna nunatsinni peqataasimasoq.
-Nersutinnguaq soorunami asalluinnaqqissaarlugu sulivugut, taamaattumik erligaarput, erligisarput aamma erligiinnarnagu tammatsaalerusupparput taamaattumik oqitsuusimanngilaq suliaq.
AAMMA ATUARUK Ukiuni tallimani sukkaniuteqataasinnaajunnaarsitaasoq
Qeqertarsuarmiut ammaanneqaraluartut, kattuffiup ileqqorissaarnissamut ataatsimiititaliaata siorna aalajangingaa tassa, Qeqertarsuarmut qimminik akusanik eqqussisoq kattuffiup aaqqissuussaanut ukiuni tallimani peqataassanngitsoq suli aalajangiusimaneqartoq, Mikkel Jeremiassen oqarpoq.
Simigaq Heilmannilu naapertorlugu, Qeqertarsuarmiut Qasigiannguani aappaagu Avannaata Qimussersuaqarnissaanut aningaasanik katersuiniarlutik aallartinnissaat suliassat tullerilerpaat.
