Qeqertarsuarmi majuartaatissaq aningaasaliiffigineqaqqittoq

Kommune Qeqertalimmi qinikkat aappaagumut missingersuutitik akuereqqammerpaat.

Qinikkat Qeqertarsuarmi sisorartarfimmi majuartaatissamut aammaarlutik aningaasaleeqqittut, Inuit Ataqatigiit sinnerlugit kommunalbestyrelsemut ilaasortaq, ataatsimiititaliamilu Timi Tarnilumi siulittaasoq oqarpoq.

- Tamatta isumaqatigiissutigivarput aningaasartuutit 2 millioninik nalillit akuersissutigalugit. Isumaqarporlu majuartaatip naammassinissaanut naammattut. Naammassisariaqalerami, Karl Thue Nathanielsen oqarpoq.

Qaasuitsup Kommunerisimasaata Qeqertarsuarmi majuartaatissaq, Østrigimi atornikoq, 2016-imi pisiaraa. Pisiarinera atorsinnaasunngorlugulu ikkussornera 600.000 koruuninik akeqartussatut taamani missingersorneqarpoq.

Missingersuummit 18-riaammik akisunerusoq

Tamannali eqquutinngilaq. Suliarmi 18-riaammik, tassa 11 millionit koruuninik aningaasartuutaareertoq, suli naammassineqanngitsoq 2019-imi maannaanaq unitsinneqarpoq.

Aningaasaliissutit maanna katillugit 13 millioninngorput.

Aallartinneranit qanoq suliarineqarnissaanut najoqqutaqarani aningaasaliinnarneqartarsimanera taamarujuk aningaasartornartoq, Karl Thue Nathanielsen oqarpoq.

- Pissutaanerpaasoq uaniippoq majuartaat suliarineqalernikuugami suliap naammassinissaanut pilersaaruteqarani,  Karl Thue Nathanielsen oqarpoq.

Misissoqqinneqaqqaassaaq

Aningaasaliissutaaqqittut majuartaatissap napparutaasa najummisussat ilaasa aalasut misissoqqinneqarnerannut, atortussallu kingulliit pisiarinerinut atussapput.

Majuartaaserisup Norgemeersup januaarimi Qeqertarsuarmukarluni misissuinissaa pilersaarutaavoq. Taanna misissuereerpat suliaq suliariumannittussarsiuunneqareeruni suliarineqarsinnaanngussaaq.

Qeqertarsuarmiulli qaqugu qamuteralaat atornagit majuartaammik majuartalernissaat qinikkap suli naluaa.

- Kissaatiginartorujuuvoq 2022-mi naammassineqarnissaa, Karl Thue Nathanielsen oqarpoq.

Majuartaatip ingerlanneranut ukiumut millioni koruuni ataaseq 2023-mit immikkoortinneqartartussatut missingersorneqartoq taanna aamma oqarpoq.