Qeqertarsuarmi ammassannik tunisineq ingerlalluartoq
Qeqertarsuarmi aalisartut 20-25-it ammassannik 100 tonsinik tunisisussaapput, maannamullu 70 tonsit missaat tunisimalereerpaat, Royal Greenland nittartakkamini taama allaaserisaqarpoq.
- Ammassannik tunisineq tunisassiorfimmi ullukkoorlutik aamma unnukkoorlutik sulisunut suliassaqartitsilluarpoq. Aalisartut pilersaarusiukkamik killilimmik tunisisarput, ataasiakkaarlutik ulloq allortarlugu tonsip ataatsip missinganik tunisisarlutik. Ammassat tonsit 13-it missingi ullormi ataatsimi tunineqartarput, Qeqertarsuarmi tunisassiorfiani ingerlatsisoq Emil Mølgaard taama oqarpoq.
Qeqertarsuarmi suliffissuarmut aamma qaleralinnik saarullinnillu tunisisoqartarpoq, aalisartulli maanna ammassanniarneq aallunneruaat.
- Maannakkorpiaq aalisartut saarullinniarnatik ammassanniarneq aallunneruaat. Ammassanniarneq illoqarfiup avatinnguani ingerlanneqarpoq - aamma ammassaqaqaaq. Taamaattumik ammassat aalisartunut aamma tunisassiorfimmi ullukkoorlutik ualikkoorlutillu sulisunut 14-iusunut suliassaqartitsilluarput, Emil Mølgaard RG.gl-imut taama oqaluttuarpoq.
Ammassat tunineqartut poortorlugit qeritinneqareeraangata Royal Greenlandip tunisassiorfiinut avannarpasinnerusuniittuni qaleralinniarnermi neqitassanngorlugit nassiunneqartarput.
