ASSIT Qeqertarsuaq Pajuttaammit ukiormanna siullerpaamik tikinneqartoq

Tassami Qeqertarsuup Tunuata sikuunera pissutigalugu, umiarsuaq pajuttaat apriilimi marloriarluni tikissinnaasimanngilaq, Qeqertarsuarmilu niuertarfiit aatsaat ippassaq nioqqutissanik ukiormanna siullerpaamik Pajuttaammik pajunneqarput.

Pajuttaat Qeqertarsuarmi Uunartuarsuup avatinnguani sikup sinaavanut usingiaavoq, taamalu Qeqertarsuarmiut nioqqutissanik sivitsulersumi amigaatigisimasaminnik pisiniarsinnaalerput.

Illoqarfiup apriilimi marloriarlugu tikinneqarsinnaasimannginnera pissutigalugu, Royal Arctic Line A/S-ip KNI A/S isumaqatigalugu aalajangerpoq sikup sinaavanut usingiaatitsiniarluni, nioqqutissallu qamuteralannik nunamut assartorneqarput.

- Taamatut periaaseqarneq aarlerinaateqarsinnaammat suliffeqarfiup atorneq-ajoraluarpaa, KNI Pilersuisumi pisortaq Finn Fabricius taama erseqqissaavoq:

- Taamaaliussallutali ippassaq aalajangerpugut, nalileratsigu nioqqutissat oqimaatsut nunamut assartugassat sikumut usingiarnissaannut ajussanngitsoq, Finn Fabricius oqarpoq, sulisullu sillimaniarnerat sunit tamanit pingaarnerpaatinneqartoq aamma erseqqissaatigalugu.

Niuertarfiilli nioqqutissanik sivisuumik amigaatigineqarsimasunik pigisaqqilerput - taamaammat illoqarfimmiut ullaaq manna yoghurtitugassaqarlutillu allanik mamartunik ullaakkorsiorsimassajunnarsipput. Maanngaanniillu ullaakkorsiorluarnissaannik kissaappagut.