Qeqertaq Fishimik piginnittut Royal Greenland annersarilerpaat
- Royal Greenlandip pingaartippaa qaleralinniarnerup iluani nukittuumik inissisimanissani. Qeqertaq Fishimilu piginneqatigiissuteqalernitsigut tunisassiornermut immikkoortortaqarfitsinni qaleralinnik amerlanerusunik tunisassiulersinnaanissatsinnut periarfissaqalerpugut, neriuutigaarpullu Qeqertaq Fiship maannakkumut naleqassusaa annertusarsinnaallutigu, Tunisassiornermut pisortaq Lars Nielsen oqarpoq.
Taassuma Qeqertaq Fishimik piginnittut isumaqatigiinniarfigisimavai, piginnittummi aktiaatiminnik tuniniaanissartik kissaatigisimavaat.
Sinerissap qanittuani qaleralinniarnermi pisasseeriaatsip nutaap kingunerisaanik, tassa umiatsiaararsortut ataatsimut qaleralittassinnerisigut angallatillu anginerit immikkut pisassinnerisigut, Qeqertaq Fish qaleralinnik 3-400 tonsinik ikinnerusunik tulaassiffigineqartalersoq, siulersuisuni ilaasortaq KNR-imut oqarpoq, tamatumalu kingunerisaanik piginnittut iluanaaruteqarunnaaramik aktiaatiminnik tuniniaapput.
Qeqertaq Fishimi aktiat 58 procentii maanna Royal Greenlandimit pigineqalerput, 35 procentii Danmarkimi angerlarsimaffeqartumit Kangaamiut Fishimit aktiallu sinnerilu 7 procentit inunnit ataasiakkaanit pigineqarput.