Qatserisartut annaassiartartullu siunissaat Atassutip ernumanartoqartippaa

Taakku isumaqarput nunatsinni innuttaqassutsimut aammalu inoqutigeeqassutsimut sanilliullugu sumiiffinni inoqarfiusuni tamani ikuallattoqarneranik kalerrisaarutit aallartinneqartartut taamaalillutillu qatserisartut annaassiniartartullu avalattarneri taamannarpassuusut, tassa illoqarfinni nunaqarfinnilu. Qatserisartutut sulinerup ima piffissatortigilersimanera aarleqqutigaat allaat pissutsit taamaaginnassappata nunatsinni qatserisartoorususseq aammalu annaassiniartartoorusussuseq annikilliartussasut, tassa taakkununnga sulinermi atugassarititaasut pitsanngoriartinneqanngippata, § 37 naapertorlugu apeqquteqaateqarlutik taama allapput.

Nunatsinni qatserisartut annaassiniartartullu ingerlanneqarneri Kommuninit, taamaalillutillu Kommunalbestyrelsenit akisussaaffigineqarput, Knud Kristiansenilli Gerhardt Petersenillu nutaamik aaqqissuusseqqittoqarsinnaanera Naalakkersuisunut isummerfigeqquaat, qatserisartoqarneq annaassiniartartoqarnerlu Namminersorlutik Oqartussanit akisussaaffigineqalersillugu.

- Inuiaqatigiittut ineriartornerput innersuussutigalugu aammalu qatserisartut annaassiniartartullu ineriartornerup ilutigisaanik akisussaaffimmik annertusiartuinnartumik tigummiaqarnerat innersuussutigalugu, isumaqarpugut piffissanngortoq Namminersorlutik Oqartussat Nunatsinni Kommunit peqatigalugit Nunatsinni qatserisartut annaassiniartartullu peqatigiiffiat “Kalaallit Nunaanni Qatserisartut Peqatigiiffiat” oqaloqatigalugu aallartissagaat, Atassutikkormiut allapput peqatigisaanillu aamma pitsaanerusunik sulinermi atugassaqartitsinissaq akissarsiarititaasullu pitsanngorsaavigineqarnissaat kiisalu ilinniaqqinnissamut periarfissat pitsanngorsarnissaat naalakkersuisunut isummerfigeqqullugu.