Qatanngutigiit guldinnattut
Taakkulu qatanngutigiit naatsorsuutigisimanngikkaluarpaat guldinnannissartik.
- Isumaqanngikkaluarpunga taama ingerlalluartigissalluta, qatanngutigiinni nukarliusoq Ivik Nielsen taama oqarpoq.
Angutit inuusuttut nerrivimmi arsaararnermi Island Gamesimi Juunip 30-ani nunatsinneersut Guernseymut unammillutik 3-1-mik ajugaapput.
Qatanngutigiit unamminermi aatsaat peqataanngillat, siornatigummi unammiartoqataasarsimapput.
Ilaatigut Islandimut Arctic Table Tennis Championshipertoqarnerani peqataasarput, nunatsinnilu GM-ertunut peqataasarlutik.
AAMMA ATUARUK Angutit nerrivimmi arsaararnermi marlukkuutaarnermi kuultinnattut
Island Gamesimili unammineq pissarsiaqarnaqaaq, unammiartalernermiilli aatsaat taama angusarissaartigalutik, qatanngutigiit KNR-imut oqaluttuarput:
- Nuanneqaaq. Island Gamesimi aatsaat guldinnakkatta misigisaq nuanneqaaq, Aqqalu Nielsen taama oqarpoq.
Qatanngutigiillu taama angusarissaartiginerat, Kalaallit Nunaanni Timersoqatigiit Kattuffianni siulittaasup aamma tupaallaatigaa. Ilimagisamimmi ingerlalluarnerusimasut, siulittaasup Nuka Kleemaannip KNR-imut oqaatigaa.
Qatanngutigiit Nielsenikkut meeraanerminiilli nerrivimmik arsaaraqatigiittalersimapput.
Qatanngutigiinni angajulliusoq, Aqqalu Nielsen, Qallunaat Nunaanni nerrivimmi arsaararnermi qaammatini arfineq-marlunni sungiusarsimavoq, nukarlerlu Ivik Nielsen aamma Danmarkimi aggustimili sungiusalersimalluni.
AAMMA ATUARUK Nerrivimmi arsaararlutik nunanut allanut unammisartut angusarissaartut