Nerrivimmi arsaararlutik nunanut allanut unammisartut angusarissaartut

Nerrivimmi arsaararluni Savalimmiuni Arctic Openimi sapaatip akunnerata massuma naanerani unammiuaartoqarmat nunatta nunanut allanut unammisartui angusarissaaqaat.

Nunatta nunanut allanut unammisartui katillugit aqqaneq-marlunnik ujaminnapput. Ujamit pingasut kuultiupput, sisamat sølviullutik tallimallu bronzeullutik.

Angutit iligiikkuutaarlutik tallimanngormat unammineranni nunatsinneersunik kuultinnattoqaqqaarpoq, arnallu iligiikkuutaat unammineranni nunarput sølvinnallunilu bronzennalluni. Greenland Table Tennis Facebookimi quppernimini taama allaaserisaqarpoq.

AAMMA ATUARUK Nunarput kuultinnanniaqqittussaasoq

Ivik Nielsen angutit ataasiakkaarneranni kuultinnappoq, arnallu angutillu akuleriillutik iligiiaarneranni Malissa Larsenilu kalaaleqatiminnut Poul Jørgen Persenimut Karlinnguaq Lundbladimullu ajugaagamik aamma kuultinnaqilluni.

Karlinnguaq Lundblad arnat ataasiakkaarneranni sølvinnappoq, Rosa Marie Petersenilu bronzennalluni. Taakkualu marluullutik arnat iligiiaarneranni aamma sølvinnapput.

Aamma Inngili Petersen, islandimiu Tinna Adelbjarnardóttur peqatigalugu, arnat iligiiaarneranni bronzennapput.

Aka Mark Møller Poul Jørgen Petersenilu angutit iligiiaarneranni sølvinnapput, Aqqalu Nielsen Ivik Nielsenilu bronzennallutik.

AAMMA ATUARUK Kalaallit nerrivimmi arsaarartartut Islandimi angusarissaartut

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat