Qassutaarsiutit amuneqanngitsut katersorniarneqartut
WWF aalisartut peqatigalugit qassutaarsiutinik ningittakkanillu qaqinngitsuukkanik katersiartorlutik aallannaqaat.
Allunaasaq kalunnilik 400 merterisut ititigisumut aalisartunit pingasunit ninginneqarpoq.
AAMMA ATUARUK Aalisaatitaarsinnaanerup ajornanngippallaarnera mingutsitsisoq
Piareersaatitut suliniut WWF Sverigemit Kommuneqarfik Sermersuumillu aallarnisarneqarpoq. Tassani qassutaarsiutit ningittakkallu qaqinngitsuukkat katersorniarneqarput, taamaalillutik immap naqqaniiginnaratik aalisartunullu akornutaajunnaarlutik atoqqinneqarsinnaanngorniassammata.
- Aalisakkanut ajoqutaapput. Pingaartumik qassutinut. Ukua ningittakkat neqitaarukkaangamik soqqissinnaajunnaartaraluarput. Kisianni qassutit sivisoorujussuarmik piusaramik napititerfigineqartuartarput. Assigiinngissutigaat taanna, ningittakkat oqummersartai asiusaramik, sivisulaamik immamiinnikuutillugit, aalisartoq Jaakooraq oqarpoq.
Ajornartorsiut iliuuseqarfigineqartoq
Aalisaatinik immap naqqaniittunik katersuiniarnermik assigiinngitsunik suliniuteqartoqartareerpoq. Massakkulli suliniummi ajornartorsiutip iliuuseqarfiginiarnissaanut alloriarnerujussuusoq, suliniummi aqutsisoq Kaare Winther Hansen oqarpoq.
Aalisaatimmi amuneqanngitsut katersoriarlugit atoqqittussanngortillugit Danmarkimut nassiunneqassapput.
Ajornartorsiut annertusiartuinnarsimavoq, tamannalu iliuuseqarfiginiarneqalermat, Kommuneqarfik Sermersuup nuannaarutigaa.
- Misileraanermi matumani nissitat sumiinnersut suunerilu paasisaqarfigisinnaanissaat neriuutigaarput, katersorneqartullu qanoq isumatusaartumik suliarineqassanersut isummerfigineqassasoq, Kommuneqarfik Sermersuumi Ingerlatsinermut Avatangiisinullu immikkoortortaqarfimmi pisortaq, Frank Rasmussen oqarpoq.
AAMMA ATUARUK Qassutit amuarneqanngitsut kommunit akisussaaffigaat
Katersuinerup iluatsilluarnissaa aqutsisup Kaare Winther Hansenip neriuutigaa:
- Allunaasaq amoorummut maanna nermupparput amuassallugulu. Qaqitagut uunga karsimut ilissavagut. Soorluuna aalisaatinik nissitaqarsimasugut, taamaammat atortut piareersimatippagut. Pissangaqaanga neriulluarlungalu.
Aalisaatikunik katersuineq siulleq iluatsippallaanngilaq. WWF-ili sapaatip akunnera una naallugu aalisaatikunik katersuinissaminik suli periarfissaqarpoq. Tamatumalu kingorna aalisaatikut kommuni suleqatigalugu suliareqqinneqassallutik.
Suliniut inerpat aalisaatikut pillugit ilitsersuutinik siunnersuutinillu nuna tamakkerlugu atorneqarsinnaasunik WWF saqqummiussissaaq.
AAMMA ATUARUK Qassutit amuneqanngitsut akornutaasut
