Qassusersortarneq uumasunik illersuiniaqatigiiffinnit isornartorsiorneqarpoq

Tamatumuuna uumasunik illersuiniaqatigiit Dyrenes Beskyttelse qassusersortarneq isornartorsiorpaat.

Uumasorsiuup Michael Carlsenip illersuiniaqatigiinneersup, Nunatta Avannaani qassusersortarneq akuerineqarsinnaannginnerarpaa:

-  Sikup ataatigut qassusersortarneq akuerineqarsinnaanngilaq, puisi anersaartorsinnaajunnaarlugu ipitinneqartarmat. Taama piniariaaseq kisiat isiginiarparput, qimitsineq ipititsinerlu isornartuupput.

-Pinngortitaruna eqqarsaatigisariaqaripput, KNAPK'p siulittaasua Henrik Sandgreen oqarpoq.

- Avannaani ukiuutillugu qaammatini marlunni kaperlattarpoq;  tassa ulloq unnuarlu taartarluni. Taamaatsillugu qassusersorneq taamaallaat atorlugu isumannaatsumik puisinniartoqarsinnaasarpoq.

Ilutigitillugulu puisinniarneq pingaaruteqaqaaq, avinngarusimasunimi allanik inuuniutissaqanngillat. Aamma eqqaamasariaqarparpoq puisi tamarluinnarmi atorneqartarmat, Henrik Sandgreen ilanngullugu oqarpoq.

KNAPK'p siulittaasua Verdensnaturfondip issittumi pinngortitalerisuanit Eva Gardemit taperserneqarpoq, taassumami paasisinnaavaa piniartut inuussutissaqartariaqarmata.

Piniarneq nungusaataanngippat, puisillu iluarusullutik uumasimappata taama piniarneqarnerat uagut ajoriffissaqartinngilarput. Soorunami neriunaraluarpoq puisip ingerlaannaq toqunissaa, tamannali taamaattuaannarsinnaanngilaq. Ajoraluartumilli aamma puisinik pissataqartoqartarpoq, tamakku ikilingaareerlutik qimaasinnaasarput, qassusersorlunili taamaattoqartarani, Eva Garde nassuiaavoq.

Ilanngullugulu tikkuarlugu, North Atlantic Marine Mammal Commissionip inerniliussimammangu, uppernarsineqarsimanngimmat puisi qassutinik pisarineqaraangami qanoq ittarnersoq.