Avannaata Kommuniata ilaani Qassuserluni qaleralinniarneq matuneqassaaq
Ukiukkut sikunerata nalaani qassutit sikussaasimasut akornutaasarnerat pissutigalugu Qeqertami aalisartut piniartullu peqatigiiffiata qassusersornerup unitsinneqarnissaa piumasaaraat.
- Matusineqarnissamut pissutaavoq, ukialernerani sikunialernerani qassusertoqaraangat, qassutit sikkussaasartut, amerlarsoorpassuusaramik, Qeqertami Aalisartut Piniartullu Peqatigiiffianni allatsi Anina Nielsen taama oqarpoq.
AAMMA ATUARUK Qalerallit Qaanaami isertitanut qaffaataasut
Torsukattammi Qeqertap avannaatungaani, qassutinik qaleralinniarneq tallimanngornermi ullup qeqqanut matuneqassaaq.
Torsukattaap avataani ukiukkut qassutinik qaleralinniartoqarsinnaasaraluartoq, Avannaata Kommuniani borgmesterip Palle Jerimiassenip ima nassuiaatigaa:
- Novemberip ulluisa aallaqqaataaniit, apriilip ulluisa 30-ata tungaanut, sumiiffinni kangerluit avataanni, qassusersorluni qaleralinniarneq inerteqqutaanngilaq, kisiiannili aasakkut inerteqqutaalluni, Palle Jerimiassen oqarpoq.
AAMMA ATUARUK Qalerallit tunineqartut quleriaammik amerleriartut
Qassusersorluni qaleralinniarneq ukiukkut sikunerani qassutit ajornartorsiortitsineranni kommunemit matuneqarsinnaavoq,
Inatsisillu malinneqassappata, sumiiffinni aalisartut piniartullu peqatigiiffii tusarniarneqartussaapput.
Taamaattumik Kommunip Ilulissani aalisartut piniartullu peqatigiiffiat IAPP aamma sinerissap qanittuani qaleralinniartut peqatigiiffiat SQQP sapaatip akunerata siuliani tusarniaaffigai, taakkualu Qeqertami peqatigiiffiup matusinissamik piumasaqarnera tapersersorneqarluni.
Qaleralinnut qassutit atorlugit aailsarneq unitsinneqassaaq
sumiiffinni ukunani:
Nuuaarsuk - Eqip avataa:
1. Nuuaarsuk 69°13,9N 51°07,1W
2. 69°13,4N 51°15,4W
3. 69°07,5N 51°12,0W
4. Eqi 69°07,9N 51°06,0W
Torssukátak - Ilulissat avannaani:
1. Naajaat 69°57,7N 51°09,9W
2. Nuffiumaneq assorleq 69°55,2N 51°01,3W
3. Sammisunnguaq 69°53,9N 50°48,6W
4. Qeqertakassaap Saqqaa 69°54,7N 50°47,0W
5. Ilerfit 69°55,2N 50°39,9W
6. Anap Nunaa 69°55,4N 50°37,0W
Avannaata Kommuniani borgmesterip aalisartut kaammattorpai, ileqqoreqqusat malinneqarnissaat aalisarfiit amerlanerusut matuneqassanngippata.
- Ileqqoreqqusat malillugit, sumiiffinni qassusersorneq matuneqarsinnaavoq, uanilu kaammattuutigerusuppara, - malitassat malitsigit, taava uatsinnut tamatta inissaqartilluta aalisassaagut, Palle Jerimiassen oqarpoq.
Kommunemit erseqqissaatigineqarpoq, qassusersorluni qaleralinniarneq matuneqarmat, saarullinnik allanillu qassuserluni aalisarneq matuneqanngimmat.
