Qasigiarmiut peqqinnissamut upalungaarsimaneq amigaraat

Qasigianguani nakorsap aalajangersimasup atorfini aasaru qimassavaa, innuttaasullu taamaammat nakorsaqarniarnikkut atugassarilerumaakatik pillugit toqqissisimanngillat. Nakorsatummi atorfik Peqqinnissaqarfiup aqutsitsisoqarfia naapertorlugu suli inuttassarsiorneqanngilaq.
Allattoq Jens Thorin
maajip 08-at 2012 06:32

Atorfilli inuttalerneqanngikkallartillugu, Qasigiannguani innuttaasut nakorsamit Aasiaanneersumit sullinneqassapput. Tassalu taamaammat Qasigiannguani upalungaarsimaneq allanngunngitsoq, aammalu pisariaqartitsineq naapertorlugu nakorsamik peqqissaasumilluunniit aggertoqartarsinnaasoq, Peqinnissaqarfiup Aqutsisoqarfia neriorsuivoq.

- Qasigiannguani nakorsaqartuassapput. Illoqarfik ukiup ulluini 365-ini ullup unnuallu ingerlaneranni akunnerni 24-ni nakorsaqassaaq, Nunap immikkoortuani Peqqinnissaqarfimmi nakorsaaneq Anne-Marie Ulrik aamma  nakorsat pisortaannut taartaagallartoq Kent Kleinschmidt allapput.

Qasigiannguani nakorsaq aasaru aallarpat nakorsaqarniarnikkut pissusiulersusssat pillugit , nalunaaqutarlu sisamap kingorna Aasianni napparsimmavimmut saaffiginnittalernissartik pillugu ernumallutik qasigiannguarmiut Peqqinnissaqarfiup Aqutsisoqarfianut apriilip 29-ani ammasunik allagaqarput (allakkat pdf-nngorlugit aakkit).

Peqqinnisaqarfiullu Aqutsisoqarfia tusagassiutinut ippassaq allappoq,  Qeqertarsuup Tunuani immikkoortuani Peqqinnissaqarfimmi Disko Peqqinnissaqarfik har innutaasunik ataatsimiititsisimasoq inunnit 75-it 100-illu akornaniittunit najuuffigineqartumik.

- Innuttaasulli toqqissisimanarinngilaat siunissami ualikkut sisamat kingorna Peqqinnissaqarfimmut saaffiginnissagunik Aasiannut sianertariaqaramik. Tamanna tusaatissatut tiguarput, innuttaasullu neriorsorpavut taama aaqqiineq ukiup affaa qaangiuppat nalilersoqqissallutigu, Anne-Marie Ulrik allappoq.

Linki ataaniittoq toorlugu Qasigiarmiut allagaat aasinnaavatit.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq