Qasigiarmiut nipilersukkanik saqqummersitseqqipput

Nipilersoqatigiit 'Tumaat' namminneq aamma tupaallaatigilaarpaat decemberip 29-ni paasigamikku nipilersukkatik saqqummersimasut.

- Nunatsinni saqqummersitsisarfinniit itigartitaallutalu saaffiginnissutigut pillugit tusagaqanngivissimavugut. Taamaammat aalajangerpugut suliaq nammineq ingerlanniarlugu, erinarsuusiortoq Kuluk Lange KNR.gl-mut oqarpoq.

Nipilersoqatigiit Kuluk Langemit, Jens Karl Sandgreenimit aamma Peter Rosbachimit 2010-mi pilersinneqarput. Rocki qituttumik taaneqarsinnaasoq atorlugu nipilersortarput ilaatigut reggaerpalaanik ilalinnik.

Arlaatalu tupiguutigissappagu sooq siornatigut tusarsimannginnerlugit tamanna nassuiaatissaqarpoq.

- Illoqarfimmi allami ilinniartuunikuuvunga aammalu erinarsuusioqatigisagara Lars Karl Sandgreen aalisartuunikuulluni. Taamaammat katersuunniarnerput ajorkusoortarnikuuvoq, Kuluk Lange nassuiaavoq.

Nipilersukkat saqqummernerat nipilersoqatigiit namminneq tupaallaatigilaarpaat. Taakku suleqatigaat digitalikkut saqqummersitsisartoq DiGiDi.dk taakkulu Itunesimut apuunnissaanik isumaginnittuupput nipilersukkat immiunnerat Qasigiannguani suliarineqartoq.

- Saqqummersitsinissamut itigartitaagatta unittuujusarsimagaluarpugut. Taamaammat tupaallaatigilaarparput decemberip 29-ni paasigatsigu saqqummersimalluta, Kuluk Lange oqarpoq.

Nipilersoqatigiit neriuutigaat nipilersukkatik cd-nngorlutik aamma saqqummersinnaajumaartut.