Qasigiannguani qimmit qimuttut qulit aallaaneqarlutik toqutaasimasut
Umiatsiaaraq Ørnvik Tuukaq, 90hk Suzukimik aquuteralattalik ataasinngornerup unnuaani Qasigiannguani umiatsialivimmit tillinneqarpoq.
Qoorortuut pingasut umiatsiamit allamiit aamma tillinneqarsimapput.
Kalaallit Nunaanni Politiit tusagassiorfinnut nalunaarummi taaama allapput.
Takunnittoq naapertorlugu umiatsiaaraq ataasinngornerup ullaavani nalunaaquttap 5.00 aamma 6.00 akornanni utersimavoq, umiatsiaararlu piginnittuanut taamaasilluni utertinneqarsimavoq. Umiatsiaaqqamulli matuersaat qoorortuullu suli maqaasineqarput.
Piffissap taassuma iluani aamma qimmit qimuttut qulit aallaaneqarlutik toqutaasimapput. Qimmit taakkua illoqarfiup kujataatungaani qeqertat ilaanniipput, politiillu isumaqarput qimmit toqunneqarsimasut akuerineqarani allat piinik artornermut attuumassuteqarsinnaasut.
- Ullup qeqqata siorna angut alla saaffiginnippoq kalerriutigalugulu qimminut qeqertanut, illoqarfiup ungasinngisaani avaataaniittunut, qimmini alakkarsimallugit. Taassumalu oqaatigaa qimmini arlallit toqutaasimasut, Aasianni Politeeqarfimmi immikkoortortami aqutsisoq politikommissærilu, Aqqaluk Pedersen, oqarpoq.
Suliamut attuumassuteqarsinnaasunik takunnissimaguit tusagaqarsimaguilluunniit Qasigiannguani politeeqarfimmut ammasarfiit nalinginnaasut iluanni takkullutit imaluunniit 70 14 23-mut sianerlutit saaffiginneqquneqarputit.
