Qasigiannguani ippassaq ajunaarnersuaqartitsisuusaartoqarpoq
Ilaasartaat Aviaq Ittuk sukkavallaartumik ingerlatilluni umiarsualivimmut aportuusaartinneqarpoq, inuit sisamat imaanut nakkarnerannik ilaasartaatillu uuliakuulerneranik kinguneqartumik. Annaassiniarnerit aallartimmata, aamma Hotelimi quleriit aappaanni pujortitsisorujussuarmik ikuallattoqalersoq kalerriutigineqalerpoq inullu ataaseq annaanniarneqartussanngorluni. Taamaalinerani politiit, qatserisartut innuttaasullu pisinnaasut ataatsikkut annaassiniarnerit qatserinerillu ulapputigileraat Qasigiannguani politeeqarfiup pisortaa Karl Vinther oqaluttuarpoq.
- Inuit imaanut nakkartut qaqiortorlugit aamma ikuallattumiit inuk annaanniarneqartoq napparsimmaviliaannneqarput, taamaalilluni aamma ajunaarnersuaqavikkaluarpat annaassiniarnermi qanoq suleriaaseqarnissaq misilinneqartoq, Karl Vinther oqaluttuarpoq.
Aperaarput Aviaq Ittuk-p umiarsualivimmut apornerani qanoq uuliakoortoqartittuusaarsimaneraat, ima akivoq.
- Attaveqarnermut Naalakkersuisoqarfimmut paasiniaagatta nerisassiornermi uulia atorsinnaaneripput, oqarfigaatigut popcornit uuliaasaartikkutsigit ajunnginnerussasoq. Taamaammat sungiusarnissaq sioqqullugu uagutsinni ullaap tungersua popcorniliorsuataarpunga poorsuaq qernertoq ulikkaarlugu. Taakkulu uuliaasaartippagut. Misigisimavugut sungiusaatigalugulu ippassaq ajutoortoqartitsisuusaarnigut iluatsilluartut, innuttaasummi tamarmik peqataatinneqarput. Sulili pisut nalilersunngilagut, oqarsinnaavungali sungiusarnerput iluatsilluaqaaq, Karl Vinther ippassaq pisut pillugit oqaluttuarpoq.
Qasigiannguani politeeqarfiup pisortaa Karl Vinther aamma oqarpoq, sungiusarlutik ajunaartoqartitsisuusaanermi qatserisartut suleqataalluarnerat qujassutissaasoq. Nina Jul Larsenip ilanngutassiaa Najâraq Egedemit kalaallisuunngortinneqarpoq.
