Qasigiannguani aalisakkerivimmi sulisut 30-t angerlartinneqassapput
Qalerallit Ilulissanut tulaanneqartartut annikillinerat aamma qalerallit tulaanneqartartut milliartuinnarnerat pissutigalugu Qasigiannguani tunisassiorfimmi Ilulissaniit pilersorneqartumi tunisassiornermi suleqatigiit maanna marluusut ataasiinnaanngortinneqassasut Royal Greenlandip aalajangerpaa. Qasigiannguani tunisassiorfimmi suleqatigiiaat ataasiinaanngortinneqarneratigut sulisut 30-it suliunnaarallarput. Royal Greenland nittartakkamini taama allaaserisaqarpoq.
- Qasigiannguani tunisassiorfimmi novemberip 30-iat aallarnerfigalugu suleqatigiiaat ataasiinnaat sulisorineqalissapput. Tamannalu peqquteqarpoq Ilulissaninngaaniit tunisassianik pilersorneqarnera ukiarnerani annikillimmat, aamma massakkut qalerallit tunineqartartut nerpiliassatut atornissaat mikivallaarmata, taama oqarpoq Royal Greenlandimi aqutsinermi ingerlatsisoq Niels Ole Møller.
Aalisartut Qasigiannguaneersut annikitsuinnarmik tunisassiorfimmut tulaassuipput, kisiannili Niels Ole Møller oqarpoq Qasigiannguani tunisassiorfik upernaaq tikillugu tunisassiorsinnaasoq.
- Massakkut Qasigiannguani avataaniit tulaassanik qerisunik tunisassiaassaateqarpoq, taakkulu suleqatigiianit ataatsinit tunisassiarineqassapput. Tunisassiassat taakku 2016-imi april ilanngullugu naammannissaat naatsorsuutigaarput, Niels Ole Møller aalisakkanik suliffeqarfissuup nittartagaanut taama oqarpoq.
