Qarsoq Høegh-Dam: Suliaq inummut aallaaviunani politikkikkut aallaaviussaaq

Siumut sinnerlugu inatsisartunut qinersinermi taaguunneqarnerpaat ilaat Qarsoq Høegh-Dam inatsisartutut ippassaq tallimanngornermi tunuarpoq. - Amerlanerussuteqartut inatsisartuni ilaasortanngortussatut piukkunngikkaannga ilimagigakku tunuarpunga, taanna oqarpoq.
Qarsoq Høegh-Dam
- Ulloq Inatsisartunut ivertinneqarneq kalaallisoorluni persuarsiorfittut atorneqartussaavoq. Taamaammat Inatsisartunut qinikkat amerlanerussutillit ilimanaatilimmik aalajangiinissaat sioqqutsinniarlugu Inatsisartuniit tunuareerniarlunga aalajangerpunga. Qarsoq Høegh-Dam, inatsisartutut tunuarnerminut taama nassuiaavoq. Assi © : KNR
Allattoq Aviâja Kilime , Signe Haahr Pedersen , Mads Lynge
apriilip 24-at 2021 19:02

Qarsoq Høegh-Dam, Siumut sinnerlugu inatsisartunut qinigaaqqammersoq, inatsisartunit ippassaq tallimanngornermi tunuarpoq.

Inatsisartunut apriilip ulluisa arfernanni qinersisoqareernerani inatsisartunngortut ataatsimeerngaarnerannut atatillugu Qarsoq Høegh-Dam tunuarpoq.

Inatsisartut ataatsimeerngaarmata, inatsisartunut qinikkat pisortatigoortumik akuerineqannginnerminni ilaasortanngortussatut piukkunnarnersut piukkunnannginnersulluunniit inatssiartut aamma naliliipput, inatsisartunilu amerlanerussuteqartut Qarsoq Høegh-Dam ilaasortanngortussatut piukkunnanngitsutut nalilerumaaraanni ilimagigini taanna allappoq, tunuarninilu KNR-imut ima nassuiaateqarfigalugu:

AAMMA ATUARUK Nuummi inuit Qarsoq Høegh-Damip tunuarnera pillugu: Uggornaq

- Naak politikkikkut sassaqqaaraluarlunga tipisiunermi paasivara, soorlulusooq inatsisartuni amerlanerussuteqartut inatsisartutut ilaasortanngorsinnaanera tapersersunngikkaat, Qarsoq Høegh-Dam KNR-imut taama oqarpoq, nangillunilu:

- Eqqoriaalluarnerit taakkua aallaavigalugit taamaammat torersumik kiisalu una pisoq inummut aallaaviussanngimmat, kisianni politikkimut aallaaviussammat taamatut kusanarnerpaaq ujarniarlugu aalajangiivunga, Siumut sinnerlugu inatsisartunut sassartoq Qarsoq Høegh-Dam taama oqarpoq.

Hashs pillugu suliami akiliisussanngortinneqartoq

Qarsoq Høegh-Dam inatsisartunut qinersinermi taaguunneqarnerpaanut ilaavoq.

796-init taaguunneqarpoq, Siumut sinnerlugu qinigaanerpaanut ilaalluni. Aslak Vilhelm-Jensen, Erik Jensen Kim Kielsenilu Siumut sinnerlugu qinigaanerpaapput.

AAMMA ATUARUK Erik Jensen Qarsoq Høegh-Dam aamma Minik Høegh-Dam tunngasunut ajuusaartoq

Qarsoq Høegh-Damip angerlarsimaffiani hashimik tuniniagassamik 49 grammimik politiit 2015-imi oktobarimi misissuinerminni nassaarisaannik, ikiaroornartuuteqartutut unnerluutigineqarluni eqqartuussaanermini pisuutinneqarpoq. Pineqaatissinneqarsimasunut sapaatit akunneranni  inissiisarfimmiittussanngortitaavoq, tamannali suliassanngorteqqinneqarluni.

Tamanna Nunatta Eqqartuussisuuneqarfiani 2019-imi oktobarimi suliareqqinneqarpoq, ikioroornartorli angerlarsimafianiittoq tuniniagassaanersoq uppernarsarneqarsinnaasimanani. Taamaammat Qarsoq Høegh-Dam akiliisussanngortinneqaannarpoq.

Suliarlu aalajangiiffiginiaaruusaarneqarmat 1500 koruuninik akiliisussanngortinneqaannarpoq.

Qarsoq Høegh-Damip pineqaatissinneqarsimannginnermut uppernarsaateqarnini Facebookimini erseqqissaatiginikuuaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk