Nuummi inuit Qarsoq Høegh-Damip tunuarnera pillugu: Uggornaq
Ugoornartorujussuuvoq.
Siumumi qinigaalluartup, Qarsoq Høegh-Damip Inatsisartunit tunuarnera pillugu taama qisuariarput.
Taanna Facebookikkut ippassaq ullaakkut allagaqarnermigut tunuarpoq. Taassumami Inatsisartuni amerlanerussuteqartut Inatsisartuni ilaasortanngortussatut piukkunnanngitsutut nalilerumaaraanni ilimagalugu allappaa.
Tamanna hashimut tunngatillugu suliamik pissuteqarpoq. Qarsoq Høegh-Damimi hashimik 49 grammimik politiit taassuma inaani 2015-imi oktobarimi nassaarisaanik tuniniaaqqinniarsimasutut eqqartuussaanikuuvoq, suliarli suliassanngorteqqinneqarnikuuvoq.
Nunatta eqqartuussisuuneqarfiata suliaq 2019-imi oktobarimi suliaraa, tassanilu haship tuniniarneqartussaanera uppernarsarneqanngilaq. Taamaammat Qarsoq Høegh-Dam 1500 koruuninik akiligassinneqaannarpoq.
Hashili hashiunngitsorluunniit pineqaraluarpat tamanna KNR-ip oqaloqatigisaasa uggoraat.
- Uanga isumaqarpunga uggornartoq. Taama pikkoritsigisoq politikereq tunuarmat, aamma pisariaqarluinnaraluarmat politikerit inuusuttut nutaat, 28-nik ukiulik, Pipaluk Kleemann peqqissaasunngorniartoq oqarpoq.
22-nik ukiullip, Nina Johansenip suliami equngasoqarluinnarsoraa. Taanna inunnik isumaginnittunngorniartuuvoq.
- Tusaamaneqarujussuuvoq, qanoq iliorsimanera ikiaroornartoq eqqarsaatigalugu. Taakku pereerput. Massakkut pisoq uaniippoq. Sooq taamani matussuserneqarsimagaluartoq suliaq kisianni pullaqqinnerani suliaq annertoorujussuanngorpoq, inuiaqatigiinnilu pikitsitsingaatsiarluni, taanna oqarpoq.
- 1000-it affaat sinnerlugit qinersipput. Inummut ataatsimut tatiginninneq inuiaqatigiinni isumalerujussuuvoq. Akisussaaffimmik kivitsisinnaanermut tapersersuisut.
Qarsoq Høegh Damip tunuarnera 86-inik ukiullip, Peter Petersenip aamma nuannaarutiginngilaa.
- Soorunami uggornarpoq. Inuusuttuulluni aamma paasinarami silappaarissuullunilu qineqqusaarnermini. Naalakkersuinermi akuusinnaassaguni taanna uggornarpoq.
Qarsoq Høegh-Dam apriilip ulluisa arfernanni qinersisoqarmat 796-init taaguunneqarpoq, Siumumilu Aslak Vilhem-Jensenimit, Erik Jensenimit aamma Kim Kielsenimit taaguunneqarnikinneruinnarluni.