Qaqortumi inuusuttut ukiumut arlaleriarlutik naartuersittartut

-Inuusuttut siorna naartuersittut 73-it Qaqortuminngaanneersuupput, sinnerilu illoqarfinni allaninngaanneersuullutik, Qaqortumi juumooq, Margrethe Kruse Jensen oqarpoq.

Qaqortoq ilinniarfeqarfiugami inuusuttut katersuuffiigaat taamaattumik amerlasuut naartuersittartut oqaatigineqartarpoq. Tunngavilersuutigineqartorlu isumaqatigineqarpallaanngilaq.

- Tamanna tunngavilersuutigineqaraangat isumaqatigineq ajorpara, napparsimmavimmit naartunaveersaartitsinermut atatillugu paasititsiniaajuarpugut, ilinniarfeqarfiillu ornillugit aamma paasititsiniaasarluta, soorlu aamma nakorsap inuusuttut ilaat ukiup ataatsip ingerlanerani pingasoriarlutik sisamariarlutilluunniit naartuersissisimasut oqaloqatigisarai, Margrethe Kruse Jensen oqarpoq nangillunilu:

Isumaqarpunga naartuersittarneq naartunaveersaartigineqartartoq taamaattumik naartuersittaqattaartartut akissussaassuseqanngitsuliortarput.

Inaluk Petersen 22-nik ukiulik isumaqarpoq, inuusuttut naartuerseqattaartartut eqqarsarluartariaqartut.

- Inuusuttut ilaat mianersugaalliornermi naatulersinnaanertik eqqarsaatigineq ajorpaat, angajoqqaannit naartunaveersaatinik atuinissara kaammattuutigiuartarpaat, Inaluk Petersen oqarpoq.

Angjoqqaat siunnersuinerusarnissaat aamma ujartorneqarpoq.

- Angajoqqaarpassuit meeqqaminnut siunnersuisarnissartik puigortarpaat, taamaattumik meerartatta ajunngitsussaq anguniarlugu siunnersorneqartarnissaat pingaaruteqarpoq, Margrethe Kruse Jensen oqarpoq.

Naartuersissimasut naartuerseqattaartartullu 19-it 23-llu akornanni ukioqartuupput.

Maniitsumi naartuersittarneq pillugu pinaveersaartitsinerit iluatsittumik ingerlanneqarput, pinaveersaartitseriaaserlu atorneqartoq aningaasassaqartikkutsigu misilikkusupparput, Qaqortumi juumooq, Margrethe Kruse Jensen oqarpoq.