Qaqortumi inissiat ikuallattut: Qaqortumi inissiaq ikuallammat inissianut sanilerisaanut marlunnut siaruaappoq
Qaqortumi inissiat sanileriit pingasut aqqussinermi Kimmernani pingasunngornermi ullaakkut ikuallammata qatserisartut qatseriartorput.
Kalaallit Nunaanni politiini pigaartut pisortaata Brian Thomsenip KNR-imut oqaluttuaraa inissiami quleriiusumi inissiap qulaani ikuallanneq aallartissimasoq,ikuallannerlu inissiat sanilerisaannut siaruaassimasoq, inunnilli ajoqusertoqarsimanngitsoq, Brian Thomsen oqarpoq.
AAMMA ATUARUK Tasiilami politiit: Sapaatip akunnerata siulia tamarmi eqqissisimasoqarpoq
Ikuallattoqarnera pillugu politiit pingasunngornermi ullaassakkut nalunaaqutaq sisamat qaangerlugu tanneq sisamanngulersoq nalunaarfigineqarput.
KNR-ip politiini pigaartut pisortaat arferngup qeqqata qaangernerani oqaluuppaa, piffissamilu tassani ikuallattoq suli qaminneqarsimanngilaq, politiit ambulancillu inissiat ikuallattut eqqaanniittut taassuma oqaluttuaraa.
Qaqortumi inissiat Kimmernaniittut, ikuallattut eqqaaniittut politiinit qinnuigineqartut igalaatik silaannarissarfitillu matussagaat, ikuallattoq pujuliungaatsiarmat.