Qaqortumi assinik saqqummersitsineq allakkajaaq

Ippassaq tallimanngornermi assinik saqqummersitsineq ’Mans Land’- kalaallisut ‘Inuit Nunaat’ Qaqortumi Katersugaasivimmi takuneqarsinnaalerpoq. Saqqummersitsinerup taagutaa Finn Larsenip assilisaanut assut tulluuppoq, Nunatsinnimi ulluinnarni inuunermi pisartut assiliisartup assilisarpai.

-Ukiut 20-it Kalaallit Nunaanni assiliisarninni misigisarsimavara assilisat amerlasuut takusarsimasakka pissutsinut piviusuvinnut akerliusartut. Kalaallit Nunaanniit assilisat takutinneqakkajuttartut tassaakkajuttarput nuna apummik qallersimasoq nuna pigineqanngitsoq. Kisianni ullutsinni Kalaallit Nunaat isigissagaanni annertunerusumik tassaavoq inuit nunaat. Inuiaqatigiit nutaaliat atuisuusut, Finn Larsen oqarpoq.

Assiliisup assilisaasa ulluinnarni ajunngitsut ajortullu pisartut takutippaat. Inuit sulisut, illoqarfimmi inuit, kisiannilu aamma nunaannarmi eqqaavissuit ammaannartut, allaat pinngortitamut toqunartut seerisut.  

Finn Larsen 1991-imi siullermeerluni Kalaallit Nunaanniippoq. Taamanerniilli 25-eriarluni angalasarsimalluni, assit tusindtillit assilisimavai, arlaleriarluni saqqummersitsisarsimalluni, allaallu marloriarluni atuakkiorsimalluni.

Saqqummersitsinermi ’MANS LAND’-imi assit takutinneqartut Sverigemi aamma Danmarkimi takutinneqareerput, ukiullu tulliani Nunatsinni katersugaasivinni allani saqqummersitsineq takutinneqarumaarpoq.