Qaqortormiut mittarfissaminnut: Narsarsuakkoortariaarulluni iluaassaaq
Qaqortumi mittarfik nutaarsuaq 2025-mi miffigineqarsinnaanngussaaq.
Canadami piginneqatigiiffiup Kalaallit Airportsillu tamanna isumaqatigiissusio<rfigaat.
Niuernermik ilinniarfimmi Qaqortumiittumi ilinniartut ilaat 2020-mi ilinnialersimasoq timmisartorluni angalangaatsiartartoq KNR-imit naapipparput.
- Pitsaasaqaaq, iluassaqaq, tassani imatut ingerlaqattaarnani imaluunniit unittaqattaarnani toqqaanartumik angalasoqarsinnaanngortoqarpat pitsaasaqaaq, Hilda Kaspersen oqarpoq.
Qaqortumut toqqaannaq angalasinnaanissaq pingaaruteqartoq taanna oqarpoq. Illoqarfimmi ilinniartoqarfiuvoq.
- Pisariaqarluinnarami manna ilinniartoqarfiugami Qaqortoq, taamaammat qulimiguullit taakkua Narsarsuarmukartarnerat ajalusoortitsisarami pitsaasaqaaq anginermik peqaleruni mittarfittaarlunilu. Hilda Kaspersen oqarpoq.
Qaqortormiut: Ajornannginnerulissasoq pisariaqanngitsorli
Lars Lundblad soraarnerussutisiaqarpoq angalanermillu nuannarisaqarluni.
Mittarfissaarnissarlu qilaaraa:
- Suna tamarmi Narsarsuakkoorluni ingerlanneqarami, taamaattumik ajornannginnerulissaaq Qaqortumi mittarfeqalerpat angalanissaq, Lars Lundblad oqarpoq.
Qaqortormiulli ilaata mittarfeqanngikkaluarpat mittarfeqaraluarpalluunniit apeqqutaatinnginnerarpaa.
- Uanga aappaatigooqartippara, Lena Pedersen oqarpoq, nangipporlu:
- Aqqusinermi biileqarpallaanngitsumi soorlu pisuttuarneq, angallammik angalaarneq, tassa nuannernerpaaq, soorunami periarfissaq aamma atortarpara timmisartussaguma, Lena Pedersen oqarpoq.
Aningaasaliissutit ilaneqartut
Qaqortumi mittarfiliortoqarnissaa piviusunngussanersoq nalorninarsigaluarpoq. Kalaallit Airportsimmi missingersuutaanut naapertuuttunik suliarinnittussarsiornermi nassaarnissaq ajornakusuuleraluarmat.
Qaqortumi mittarfissap sananeqarnissaa Inatsisartut 2018-imi akueralugu aningaasaliiffigimmassuk taamanikkut 570 millionit koruuninik aningaasaliiffigineqarpoq. Taakkuali naammanngimmata siorna ukiakkut aningaasaliissutit 462 millionit koruuninik ilaneqarmat piviusunngortinneqarsinnaanngorpoq.
Mittarfiliorneq upernaaru aallartissaaq, tassani mittarfik, timmisartoqarfik Qaqortumiit aqqusineq biilinullu uniffissat sanaartorneqassallutik.
