Qaqiffinnissamut ukiuni marlunni utaqqisoqartarpoq
Imerajuttuunermut Qaqiffinni katsorsartinneq kommuneqarfinnut 15.000 koruuneqartarpoq imerajuttunut ikiaroornartumillu atornerluisunut katsorsartinneq 22.000 koruuneqarluni. Suliffeqarfeqarpoq sulisumik Qaqiffimmi katsorsartinnerannut akiliisartunik, innuttaasulli suliffissaaleqisut
kommuninit akiliunneqartarput. Katsorsartikkumasut amerlagaangata akissallu killeqaraangata katsorsartinnissamut utaqqisoqartariaqartarpoq. Qasigiannguit kommunianni utaqqisut massakkut 23-iupput, taakku ilaasa ukiut marluk pingasulluunniit utaqqisariaqarnissartik naatsorsuutigisariaqarpaat, kommunip akissai killeqarmata. Kommunimi Isumaginninnermut Ataatsimiititaliap siulittaasua Inge Marie Rosing, Siumut, ima oqarpoq:
- Amerlasuut ukiut marluk tikillugit utaqqisuupput. Aningaasaliissutitigut ukiuni tulliuttuni piareersimajuaannarnissarput kissaatigeqaarput, kisianni familiekursusit - ilaqutariinnut katsorsaanerit - kingunerisaanik Qaqiffianniartut amerliartuinnartillugit aningaasaqarniarnikkut allatigullu ingerlaniarnerput ilungersunareersoq pissutigalugu nammassinnaasagut killeqaleriartortussaassapput.
Inge Marie Rosing oqarpoq Qaqiffikkumallutik utaqqisuniittut arlallit utaqqikatannertik pissutigalugu aamma tamaatiinnarsimasut. Taamaatiinnartarneq ilaqutariinnut aamma eqquisartoq oqaatigaa, familiekursuserniartut - ilaqutariittut katsorsartinniartut - amerlisarmata uteqattaartumillu katsorsartittoqartarmat.
- Ingerlaqqinnissamik kissaateqartoqaraluarpoq. Qasigiannguit kommuniata aningaasaqarniarnera killeqareermat Qaqiffinniartut eqqarsaatigalugit aamma
pingaarnersiuilluni tulleriaarisoqartariaqartartoq Isumaginninnermut Ataatsimiititaliap siulittaasua oqarpoq.
Kommuneqarfiit akissaqarpianngitsut eqqarsaatigalugit Namminersornerullutik Oqartussat aningaasartuutissatigut tapiinerusartuuppata, taava utaqqisoqarpallaartassanngikkaluartoq, Inge Marie Rosing oqarpoq.
- Qaqiffinnerup avataatigut aningaasartuuteqartoqartarpoq; katsorsartittup akissarsiorsinnaajunnaarnerani akiligassaanut tapiissuteqartoqartariaqartarpoq. Soorlu nerisaqarnera illumut, innaallagissamut allanullu akiligassanut taperneqartarpoq, tamakku qaavatigut aningaasartuutaasarput. Tassa soorlu sapaatip-akunnerini qulini katsorsartinneq katillugit 175.000 koruunit nalinginut aningaasartuutinngorsinnaasarpoq. Tamaattumik Namminersornerullutik Oqartussat tapeeqataasareeraluartut annertunerusumik aningaasaliissuteqartalernissaat pisariaqartinneqariartussaaq.
Inge Marie Rosing aamma oqarpoq Qasigiannguanut tikisitsilluni ilaqutariinnik katsorsaasitsisarnerit ukiuni kingulliunerusuni assut soqutigineqaleriartortut, tamatumalu kingunerisaanik Qaqiffimmi katsorsartikkumallutik saaffiginnittartut aamma amerliartuinnartut.
