Qanigisaasut ilisimateqqaarnagit ilineqarsimavoq
Qatannngutaasut qanigisaasullu qaammatini maanna tallimanngulersimasuni ilisimasimanngilaat qatanngummi arsai sumiinnersut.
Pisup alianartup radioaviisimi oqaluttuarineqarnerani paasinarsivoq, Siivaleeqqap arsai Københavnimi iliveqarfimmi Vestre Kirkegårdimi kalaallit iliveqarfiannut ilineqarsimasut, qanigisai qatanngutaalu ilisaasimaneranik ilisimatinneqaratik.
Siivaleeeraq Petersen Københavnemi oqaluffimmi Vor Frelsers Kirkemi eqqaaniarneqarluni naalagiuserineqarmat palasimit oqaatigineqarpoq, arsai nunatsinni ilineqarumaartut, meerai Nuummi najugaqarmata aamma
qatanngutaasa kissaatigimmassuk arsai Nuummi ilineqarumaartut.
Maanna qaammatit tallimat qaangiutereersullu arsai Nuummi ilineqartussatut kissaatigisaq suli pinngilaq.
Maanna Siverth Petersenip arsai Københavnimi iliveqarfimmi Vestre Kirkegårdemi ilineqarsimasut, oqaluffimmit Vor Frelsers Kirkemit radioaviisimut oqaluttuarineqarpoq, tamanna ilaqutai paasiteqqaarnagit pisimavoq.
Siivaleeraq ukiorpassuarni Ryoal Greenlandip kilisaataataani inuttaavoq. Royal Greenland Siivaleeqqap arsaasa nunatsinnukaanneqarnissaanut akiliuumalluni neriorsuuteqarpoq.
- Royal Greenlandi pisumi alianartumi uani, ilaqutaasunut neriorsuuteqarpoq, arsat Danmarkimiit Nunatsinnut nassiunneqarnissaanut aningaasartuutinut akiliuumalluni, neriorsuutigineqanngilaq, arsat nunatsinnut nassiunneqarnissaannut Royal Greenland isumaginnittuussaassasoq, Roayl Greenlandimi tusagassiinermik ingerlatsisisoq Katé Hansen taamatut oqarpoq.
Royal Greenlandip kilisaataani inuttat sullinneqarnerannik isumaginnittoq, Christian Laursen oqarpoq, juulip qaammatani ilaqutaasunit saaffigineqarnermi kingorna Siivaleeqqap arsai sumiinnersut paasiniarsimagaluarlutik, taamanilu paasiniaanera kinguneqarsimanngitsoq.
Siverth Peterseniugaluup ilaqutai akuersiteqqaarnagit Danmarkimi ilisaanissaanik kina aalajangiisuusimanersoq manna tikillugu suli paasinarsinngilaq.
Siivaleeqqap aleqaa Mathilde Berthelsen Radioaviisimit kalerineqarpoq , Siivaleeraq Danmarkimi iliveqarfimmi Vestre Kirkegårdimi ilisaareersimasoq.
- Sumiinera paasigakku eqqissiallappunga, Mathilde oqarpoq.
Siivaleeraq Nuummi ilisaassanersoq imaluunniit iliveqarfimmi Vestre Kirkegaardimiiginnassanersoq qatanngutaasunit qanigisaasunillu maanna paasiniarneqassaaq.
Københavnip kommunea radioaviisimit attaviginiarsimagaluarparput, paasiniarlugu sooq Siverth Petersen ilaqutaqanngitsutut naatsorsuussalluni Danmarkimi ilineqarsimanersoq, tamannali iluatsinngitsoorparput.