Qallunaatsiaat naasorissaanermut illorpassuit atortarsimavaat
Ph.d-nngorniaq Christian Koch Madsen ilisimatusarluni suliniut Nordlige Verdener-imut atatillugu qallunaatsiaat illukuinik misissuinermini nalunaarusiaa Danmarkip katersugaasivissuani saqqummiuppai. Christian Koch Madsen-imi nunatta kujataani qallunaatsiaat nunaqarfigisimasaanni Vatnahverfi-mi illukunik misissuimmat immikkoortitersinnaasimavai, nunalerisarnerilu qanoq ingerlanneqartarsimanersut aatsaavissuaq iluamik paasineqarlutik.
- Naasorissaasoqarfiup aaqqissuulluagaasimanera tupaallannarnerpaajuvoq, ilami illukut tamavimmik ataqatigiissaarluagaasumik inisisimammata imaaliallaannaq sumiissusersisinnaasimavakka nalunaarsorlugillu. Tassa naasorissaasoqarfik illuinnaanani naggorissagaannaanilu nuna avatagiiseq tamavimmi atorluarneqarsimaqaaq, nunaminertannguillu karrinik assigisaannillu naatitsiviusinnaasut tamarmik atorluarneqarsimallutik, Christian Koch Madsen oqarpoq, 1200-kkunnilu nunatsinni issinneruleriartuinnarnera ilutigalugu qallunaatsiaat sinerissamiit qimagukkiartulereersimaneri, kangerlunnullu pulatiteqqissimaneri takutissinnaanngorsimanerarlugu:
- Inuiaqatigiit taakku nunaqarfii pilersinneqaqqaarmata allilertorsimaqaat, silaannaallu kiannera iluatsiinnarlugu inuit tikeraleriarmata suli siaruaannerusimallutik. Inuerukkiartulermalli illorsuit kangerlunniittut angutinik pissartanik sanaartorneqaqqaartut aallaaviuleqqissimapput, tassalu kingullersaallutik inuerullutik, Christian Koch Madsen oqarpoq.
Qallunaatsiaalli puisituumasut ilisimaneqarpoq. Taamaammat naasorissaasoqarfiit sinerissamut qaninnerusut inueruteqqaarsimaneri paatsuuganarsinnaalluni. Tamannali Christian Koch Madsenip nassuiaatissaqartippaa:
- Qallunaatsiaat naasorissaasuunertik kinaasutsiminnut qitiulluinnartuuvoq, nersutaatitillu tulluusimaarutigisaqalutigit. Tassa qanoq atugarissaartingineq takutinneqarusukkaangat qanoq nersussuaateqartigineq apeqqutaatinneqartarpoq, taamaammallu naasorissaasoqarfeeqqalluunniit allaat nersussuaateqartarsimallutik, Christian Koch Madsen oqarpoq.
Christian Koch Madsen-ip Ph.d.-nngorniutaa ilisimatusarluni suliniummut Nordlige Verdener-imut atasuuvoq, suliniutillu inernerisa ulluni makkunani Danmarkimi Katersugaasivissuarmi saqqummiussuunneqartuni ilaalluni.
