Qallunaat qimaasunik isiginninnerat eqqumiitsuliortup sammivaa

Saqqummersitsineq quiassuartumik qulequtserneqarsimavoq: "Danmark 2010 - "inuiaqatigiinnut nunarsuarmik pilluarnerpaat pillugit ilitsersuut".

Qulequtaq quiassuartuuvoq, saqqummersitsinermilu Danmarkimi ullutsinni atukkat ajortortaat sammineqarput.

Danskit imminnut kusanartumik isigineratigut taavalu kunngeqarfiup kusanarpallaanngitsumik saqqummertarneratigut equngassuseq Saqqummesitsinermi takutinniarneqarpoq.

Saqqummersitsisut atugarissaarnerup ajorsiartornera, innuttaasut pisinnaatitaaffiisa millisarneqartuarnerat allamiunillu ajortumik pasillileriartorneq eqqaasitsissutigaat.

Danskit nunani allamiullu assilialiortartut suliaasigut saqqummersitsinermi takutinniarneqarpoq.

Julie Edel Hardenbergip saqqummersitsinermut nassarpaa eqqumiitsuliani "Nuna pilluarnartoq". Taanna tassaavoq danskit erfalasuat 3 meterisut takitigisoq ataasiinnaangitsumik, kisianni arfineq-marlorsuarnik sanningasortalik.

Julie Edel Hardenberg oqarpoq, sanningasutigut arfineq-marlutsigut takutikkusukkini, qimaasut inuuinnarumallutik Danmarkimiinnissamik qinnuteqaraangamik, arfineq-marlunnik quppernilimmik immersuisariaqartarnerat.

Saqqummersitsineq sapaatip akunnerata siuliani ammarneqarpoq, Galleri Overgadenimullu aggutsip 15-it tikillugu takuniarneqarsinaalluni.