Qallunaat marluk Hubeimit tikittut aneqqusaajunnaartut

Qallunaat qulit Kinami nunap immikkoortuanit Hubeimit coronavirusimik tuniluuffiusumit Roskildep mittarfianut ataasinngornermi tikipput.

Tamarmik ajunngillat, marlullu angerlarsimaffimminnit aneqqusaajunnaarput, peqqinnissamut aqutsisoqarfik tusagassiutinut taama nalunaaruteqarpoq.

Qimagussorneqartut nappaammut nualluummik ersiuteqanngimata nappasimmavimmut unitsitaanngillat.

Tikittummi tamarmik coronaviruseqarnersut nakorsaanernit ataasiakkaarlugit misissoqqissaarneqarput.

AAMMA ATUARUK Danskit sisamat Wuhanimiit angerlaanneqarlutik timmisartuunneqalersut

- Marluk coronavirusimik tunillatsissimanermut ilimanaateqarmata angerlarsimaffimminnit ulluni 14-ini aneqqusaajunnaarallassasut isumaqatigiippugut, napparsimasut isumannaatsumik sullinneqarnissaannut aqutsisoqarfimmi pisortaq, Anne-Marie Vangsted, oqarpoq.

- Arfineq-pingasut coronavirusimik tunillatsissimanermut ilimanaateqanngitsut misissoqqissaarneranni paasivarput. Arlaannik ersiuteqalissagaluarunik qanoq iliornissaminnut nassuiaanneqaqqissaarput.

Taakkualu tamarmik peqqinnissamut oqartussanit malittareqqiivigineqarumaartut, Anne-Marie Vangstedip aamma erseqqissaatigaa.

Qallunaaq alla Kinamit aamma qimagussorneqarpoq, taannali coronaviruseqarnermut ersiuteqarmat Belgiami napparsimmaviit ilaannut unitsitaavoq.

Danmarkimi oqartussat inuit Kinamit qimagussortitaat katillugit 15-iupput.

Kinamit qimagussorneqartut tamarmik coronavisuseqarnersut peqqissutsimut oqartussanit aallannginneranni angalanerannilu misissorneqarput.

Ingerlaqqinnissamut napparsimannginnissaq piumasaqaataasimavoq.