Qallunaat imernikinnerulersimapput
Qallunaat 2009-mi ukiup siulianut naleqqiullugu imigassartunnginnerusimapput. Imigassat tunineqartut 2009-mi qaammatini siullerni qulingiluani 20 procentimik appariarsimapput. Tamatuma saniatigut 2004-mi kisitsisinut naleqqiullugu inuup ataatsip agguaqatigiisillugu imigassartortagaa 1,5 literimik aamma appariarsimavoq.
Qallunaat nunaanni immiortartut peqatigiiffiat malillugu, immiaaqqanik tunisaqartarneq 2009-mi 8 procentimik appariarsimavoq, aamma viinnit tunisat ukiup affaani siullermi 14 procentimik appariarsimapput.
Qallunaat Nunaanni naatsorsueqqissaartarfik malillugu imigassamik atuineq ukiuni arlaqartuni qaffakkiaartuaarsimavoq.
Imigassaq pillugu immikkut ilisimasallip Kit Broholmip, peqqissutsimut aqutsisoqarfimmeersup, kisitsisit takutitaat nuannaarutigaa.
- Imigassanik tunisaqartarneq sooq appariarsimanersoq kialluunniit ilisimaqqissaanngilaa, taamaakkaluartoq peqqissuunissap pitsaasumillu inuuneqarnissap pingaartinneqaraluttuinnarnera patsisaaratarsinnaavoq, Kit Broholm The Copenhagen Postimut oqarpoq.
Dansk Supermarked-mit aamma COOP-imit kisitsisit saqqummiunneqartut tigulluarneqanngillat. Taakku oqaatigaat, qallunaat nunanut allanut imigasarsiniartarneq aallukkaluttuinnaraat, kisitsisillu taakkununnga tunngasut naatsorsuinermi ilanngunneqarsimanngitsut.
Killeqarfimmi niuertut peqatigiiffiata IGG-ip siulittaasua Erik Holm Jensen malillugu, tunisakinnerulerneq pisiniarfiit unammilleqatigiinnginnerannit patsiseqarpoq, taamaammallu atuisartut Tysklandimi imigassanik pisinissaq orniginerugaat.
- Qallunaat europamiunit allanit sianiinnerunngillat, akigitinneqartunut malinnaalluartuupput, Erik Holm Jensen oqarpoq.
