Qallunaaq itsarnisarsiooq nannumit saassuunneqarpoq

Jens Fog Jensen nannumit timimigut arlaleriarluni kiineqarpoq suleqataata Bjarne Grønnowip nanoq aallallugu toqunnissaata tungaanut.

- Pisoq sukkanermut eqqarsaateqarpallaanngilanga. Kisianni pisoq qaangiutereermat soorunami tupannera takkuppoq, Jens Fog Jensen oqarpoq.

Taanna maannakkut Danmarkimut utersimalereerpoq nannumillu saassunneqarnini qaangerniartussanngorlugu.

Nanoq saassussisoq itsarnisarsiuut eqqaannut pisimavoq. Itsarnisarsiuullu qunusaarlugu peerseriaraluarsimavaat, taamaalimmatalu nanoq saassussisimavoq Jens Fog Jensenilu uppisillugu.

- Palloqqavunga nanorlu qaanniippoq. Quttoqqakkut talikkullu kiivaanga. Taamalisorlu suleqatiga takkuppoq aallaallugulu, Jens Fog Jensen oqaluttuarpoq.

Nanoq aallaaneqarami erngerluni toquvoq. Piaraavoq marluk missaannik ukiulik.

- Qujanartumik piaraangami. Inersimasuungaluarunimi immaqa erngerluni toqussimassangaluarpaanga, Jens Fog Jensen oqarpoq.