Qalerallit pillugit mianersoqqussuteqarniarneq unitsiinnarneqartoq

- Kalaallit Nunaanni qalerallit qanoq aalisarneqartigineri pillugit, tamassuminnga ilisimannittunit Kalaallit Nunaannilu aalisartut piniartullu kattuffiannit, KNAPK-mit ikiorteqarluta paasiniaanerit sukimiisut pissarsiaraagut. Paasisatsinnut ilaapput, sinerissami qanittumi qaleralinniarneq nungusaataanngitsumik ingerlanneqartoq, naak qalerannik pisassiinermik suliaqarneq ilaatigut ajornartorsiutaasaraluartoq, WWF-ip generalsekretæria Gitte Seeberg taama allappoq.

Taama naliliinermi WWF-ip Danmarkimi immikkoortortaata maanna suliassarilerpaa, nunat WWF-imut ilaasortaasut allat, ilaatigut Schweiz, qalerallit Nuntsinni nungusaataanngitsumik aalisarneqarnerannik paasisitsiniaanissaat.

WWF-i taama naliliigaluarluni taamaattoq, qaleralinnik pisisartut piumaffigaat, qalerallit mianersortumik nungusaataanngitsumillu aalisarneqarnissaat nakkutigeqqissaassagaat, tassami WWF-ip suli suliniutiginiarpaa qalerallit aalisapilunneqanginnissaat.

- Qeqertarsuup Tunuani qalerallit ukiuni kingullerni pisarineqartartut milligaluttuinnarput, taamaakkaluartoq nunat allat qalerannik pisisartut piumaffiginianngilagut pisisarunnaarnissaannik. Maanna neriuutigiinnarparput qalerallit MSC-mik meqqilersorneqalernerisa kinguneranik taakku amerliartorlutillu alliartorsinnaanissaat, WWF-ip generalsekretæria Gitte Seeberg allappoq.