Inuussutissarsiutit

VIDEO Qaleralittassiissutit naalakkersuisooqataasut akerleraat

Qalerallit 28.500 tonsit. Naalakkersuisut aappaagumut taama pisassiipput. Pisassiissutigineqartulli uummassusilerisut innersuussaannit 8.200 tonsinik amerlanerupput.

Allattoq Nûno Isbosethsen

decembarip 02-at 2015 14:05

Uummaassusilerisut 20.300 tonsinik pisassiisoqarnissaa siunnersuutigineqaraluarpoq.
Pisassat 8.200 tonsinik nikinganerat, isummanik assigiinngitsunik isummersorfigineqarpoq.
- Amerlavallaaqaat, kingunissaalu eqqarsaatigalugit ernumanarpoq. Biologit innersuussutaat qaangerlugit pisassiisarneq aalisakkat ikilipiloornissaannik kinguneqariaannaammat.

- Naalakkersuisooqatigiit arlalinnik parteeqarput. Tamattalu piumasagut pisinnaanngilagut, Michael Rosing Demokraatinit Inatsisartunut ilaasortaq oqarpoq.

Aamma atuaruk VIDEO Saarullittassiissutit uummassusilerisunit annilaaganartoqartinneqarput

Illuatungiliuttulli Partii Naleraq, Naalakkersuisut aaliangiussaanut isumaqataapput.

- Pisassiissutigineqartut ajorinngilagut aamma tapersersorpagut. Takusinnaagatsigu peqassuseq navianartorsiortinngikkaluarlugu pisassiisoqartoq. Taannalu aalisartunut toqqissisimanarpoq aammalu uatsinnut, Partii Naleqqap siulittaasua Hans Enoksen oqarpoq.

Illuatungiliuttulli aappaata isumaat allarluinnaavoq.

- Tassami illersorneqarsinnaasumik qaffaaniarutta qaffaasariaqarpugut. Aappaagumut Pinngortitaleriffiup inassuteqaataa taama annertutigisumik sipporniarutsigu ukiut tulliuttut ajornartorsiuleratarsinnaanerput eqqarsaatigisariaqarparput, Ane Hansen Inuit Ataqatigiinneersoq oqarpoq.

Aamma atuaruk Qaleralinnut akitsuusersuinissaq akuersissutigineqarpoq

Siumukkut pisassiineq taperserpaat.

- Tassa Naalakkersuisut taamatut pisassiinerat taperserparput. Peqqutigalugu uneqattaanngitsumik aalisarnissaq tassani siunertaavoq. Aammalu aningaasarsiornerup siuarsarneqarnissaa eqqarsaatigalugu isumaqarpunga tulluuttuusoq, Nikolaj Jerimiassen Siumumit taama oqarpoq.