Qaleralittasseeriaatsip tuaviuussaanera uivertitsisoq
Naalakkersuisut aqutsiveqarfik 47-imi, tassa Qeqertarsuup tunuani, Uummannami Upernavimmilu, umiatsiaararsorlutik qaleralinniartut pisassaat decembarimi ukiumoortunngortippaat.
Taama aaqqiigaluarnertik allanngortillugu pisassiisarneq maanna qaammatit pingasukkaartunngortippaat. Aalisartunit, susassaqartunit peqatigiiffinnit kattuffinniillu kiisalu naalakkersuinikkut illuatungiliuttunit qisuariarfigineqareersorlu taama pisoqarpoq.
- Taamatut aalajangerninnut patsisaasunut ilaavoq, aalisartut arlallit qisuariaramik aammalu kattuffiit qisuariarlutik. Taamaammat tassuuna naaperiarnertut isigalugu aaqqiissuteqarpugut, Aqqaluaq B. Egede (IA) oqarpoq.
Sangujoraarneq isornartorsiorneqartoq
Qaleralittasseeriaatsip Naalakkersuisunit allanngorteqqinneqarnera aalisartut, kattuffiit susassaqartullu allat Inatsisartunilu illuatungiliuttut Siumup isornartorsiorpaat.
AAMMA ATUARUK Siumup qalerallit pillugit sangujoraartoqarunnaarnissaa kaammattuutigaa
Karl Tobiassen, Siumumit Inatsisartuni ilaasortap, tusagassiutinut nalunaaruteqarluni ilaatigut ima allappoq:
- Akuersaarneqarsinnaanngilaq piffissap taama sivikitsigisup iluani atuisunik tusarniaannguarani aammaarlunilu suusupaginnilluni aalajangersaasoqaqqimmat, Karl Tobiassen allappoq.
Naalakersuisoq isornartorsiuisunut naaperiaasoq
Qaammatikkaartumik pisassaqarnerup allanngortinneqannginnerani aalajangiinissamut piffissartornerusimasariaqaraluarlutik aalisarnermut piniarnermullu naalakkersuisup nassuerutigaa.
- Aamma isumaqarpunga torrallannerusimasinnaagaluaripput immaqa qaammatikkaartup allanngortinnginnerani piffissamut ungasinnerusumut aaqqiissutissanik suliaqarnermi piffissaqarsimasuugutta.
- Qaammatikkaartitsigallaratta nuussisariaqartaaginnaavinnikuuvugut piffissaq kingulleq aalisarneq unittooqqunagu, taamaammat pisariaqarnikooreerpoq allannguinissaq.
Umiatsiaararsorlutik aalisartut qaammatikkaartumik pisassaat nungukkaangata ilaqqinneqarnissaanut piffissarujussuaq atorneqartartoq Naalakkersuisup ilanngullugu oqaatigaa.
Taamaammat qaammatinik pingasukkaarilerneq pitsaanerpaamik aaqqiinerusoq Aqqaluaq B. Egede oqarpoq.
- Aammalu allannguisoqassappat Naalakkersuisut ataatsimiinneranni aatsaat tamanna isumagineqarsinnaasarpoq taamaammat pisariaqartoq unaanikuuvoq piffissaq kingullerpiavik piffissarujussuaq atorlugu ulapputipilooqattaarneq qimallugu qaammatinik pingasukkaartunngorlugu nuussineq inuiaqatigiinnut, aalisartunut, aningaasarsiornermut aammalu ineriartornerup ataavarnerusup pinissaanut pitsaanerpaajusutut isigivara.
Allanngortinneqaqqinnginnissaa qulakkeerneqarsinnanngitsoq
Maanna taama aaqqiineq siunissami allanngorteqqinneqassanersoq Aqqaluaq B. Egedep maanna oqaatigiumanngilaa.
- Allannguisinnaasarnerit allannguinaveersaarnermut taarsiullugu eqaatsumik periuseqarnissamut ujartuiuartariaqartugut isumaqarpunga. Taamaammat oqarsinnaanngilanga ukiup sinnera allanngortoqaqqissanngilaq imaluunniit allanngortoqaqqissooq.