Qaleralik miluuttulik
Danskit nutaarsiassaqartitsivianiit oqaluttuarineqarpoq, kalaallit tunisassiorfimmi sulisut qaleralik pissusissamiisuunngitsumik isikkoqartoq nassaarisimagaat. Maannalu paasinarsivoq, eqqumiitsorsiaq taannatuaasoq.
- Ilumoorpoq, qaleralik taanna eqqumiitsoq maani tunisassiorfimmi nassaaraarput. Tamannalu tunisassiat pitsaasusaanut pisortap, Dorthe Korsgaardip pulaarnerani pivoq. Qaleralimmik taamaattumik maani Qasigiannguani Uummannamiluunniit siornatigut kingornatigulluunniit takusimanngisaannarpugut, Royal Greenlandip Qasigiannguani tunisassiorfiata pisortaa, Ole Vestergaad, Radioaviisimut allappoq.
Nutaarsiassarli nutaaviunngilaq. Tassami siornaak nassaarneq pisimasoq, Royal Greenlandip tunisassiat pitsaasusaanut pisortaata, Dorthe Korsgaardip oqaatigaa.
Qaleralilli taanna ataaseq putulik, miluuttunillu uumasuaralik, siornaak Qasigiannguani Royal Greenlandip tunisassiorfiani nassaarineqarmat, ataasinnguamilluunniit taamaattumik naammattuisoqarsimanngitsoq Dorthe Korsgaardip oqaluttuaraa.
Miluuttut Myxobolus groenlandicusimik Københavnip Universitetiani uumasut nappaataannik ilisimatusarfimmi ilisimatuumit, professor Kurt Buchmannimit taaguuserneqarput. Taanna videnskab.dk-mut erseqqissaavoq, taakku inunnut ulorianaateqanngitsut.
- Uumasuaqqap miluuttup aalisartut aalisakkeriviillu isertitakinnerulernerinik kinguneqarsinnaanera eqqaassanngikkaanni inunnut ulorianaateqanngilaq, tassami uumasuaraq inunnut tuniluussinnaanngilluinartuuvoq, Kurt Buchmann taama eqqissisaavoq.
Nunatsinnilu aalisartut isertitakinnerulerneranik kinguneqarnissaa ilimanaateqanngilluinnarpoq, tassami Royal Greenland, aalisakkamik taammaattumik ataasinnavimmik naammattuisimavoq.
