Qalasersuarmiinneq iluatsilluarnerarpaat

- Ilisimasassarsiornerput pilersaarutit malillugit ingerlanneqarsinnaasimammat iluatsilluaqaaq. Sumiiffiimmi soorlu Lomonosov-ip qaqqarsuini misissugassanik tigusiffiginiakkavut angusinnaasimavagut, Amundsen-illu imarpittaata naqqa qanoq ittuunersoq paasisaqarfigalutigu. Lomonosov-ip qaqqarsuiniit ujaqqanik tigusisinnaasimagatta iluatsitsilluarsimaqaagut, Christian Marcussen taama oqarpoq.

Taassuma Helsingør-imi Niuernermut- Imarsiornermullu katersugaasivianni oqalugiarnermini eqqartorpaa issittup imaata sikua saalisimagaluaqisoq misissugassaminnik tigusiniartarnertik ilungersunarsimasoq.

- Immammi sikuata meterit marluk tallimallu akornanni issussuseqarsinnaasarnerata saniatigut siku ingerlaartuartuummat naqitsinerujussuaq pilersissinnaasarpoq. Tassa atortorissaarutivut immap iluaniitsitavut sikup ingerlaartup aserorsinnaasarpai. Aamma siku aserorteqqaarlugu misissuinivut aatsaat aallartissinnaasaratsigit ilaannikkut kipiluttunartaqaaq akisusaqalunilu, Christian Marcussen oqarpoq.

Aasaq ilisimasassarsiornermi paasissutissat katersat maanna misissugarineqaleruttorput, katersallumi ima amerlatigaat, aatsaat 2014-imi tamakkerlugit misissugarineqarsimanissaat ilimagineqarluni. Ukiormi taanna nunat killeqarfissaminnut piumasaqaatissaanut atatillugu misissuinermut inernerinik saqqummiusinissamut Naalagaaffiit Peqatigiit killigititaraa. Danmarkimmi naalagaafeqatigiinnerup aqqani imarpiit sumiiffinni assigiinngitsuni tallimaniittut piumasarinialersaarpai, tassaallutillu Savalimmiut avannaatungaaniittoq kujataatungaaniittorlu, kiisalu Nunatta imartaasa kujataatungaani, avannaatakangiatungaani kiisalu avannaatungaaniittut piumasarinialersaarlugit. Naalagaaffiilli Peqatigiit imarpiit pillugit inatsisinik kommisioniat aalajangiisussaatitaanngilaq.

- Tassa nunat pineqartut nunat tamalaat inatsisaat malillugu isumaqatigiinniartussaassapput. Isumaqatigiisinnaanngerluinnarpatali nunat tamalaat eqqartuussivii Haag-imiittoq Hamborg-imiittorluunniit aqqutissatuaalissapput, Christian Marcussen oqarpoq.

Nunavittarsuit killeqarfii ukiuni aqqaneq marlunni sumiissusersiorneqarmata 331 millionit koruuninik Naalagaafeqatigiinnut aningaasartuutigineqarput.