Qaasuitsup ombudsmandimit isornartorsiorneqarnini akueriinnarpaa
Isornartorsiuinermut tunngaviuvoq, kommunip niviarsiaqqamik 17-inik ukiulimmik ulloq unnuarlu angerlarsimaffimmi inissaanik ujarliussinermini kinguartiteritillugu, niviarsiaraq pinerluuteqasimasunut inersimasunut inissiisarfimmi imminut toqummat.
- Ataatsimut isigalugu suliat taamaattut Nunatsinni ikittuararsuupput. Kisianni tamaakkaluarpalluunniit pisimasoq naalliunnarlunilu alianarpoq. Kisianni ataatsimik neriorsuisinnaavunga, tassalu suleriaatsitsinnik sukaterissaagut, aamma malittarisassanik sukaterissaagut, aamma inuusuttuaqqat meeqqallu pisariaqartitsisut qularnaatsumik inissinnissaannut sukkanerulissaagut, Qaasuitsup Kommuniani isumaginninnermut pisortatut atorfinerlaaq, Henrik Sóloy, taama oqarpoq.
Aamma atuaruk Ombudsmandip kommuni inissiinngitsoorsimaneranik upissuppaa
Qanoq ililluni taama ajortigisumik pisoqarsinnaanera akiuminaatsippaa, tassami taamani taama pisoqarmat, kommunimi suli atorfininnginnami.
- Kisianni sulianut tunngasut atuaraangakkit takusinnaavara, suleriaatsit ilaat kukkusuusut aammalu iliuusissat tigussaasut iliuuserineqarsinnaanerat ilisimaneqarsimanani. Tassalu isertitsivimmut taarsiullugu inissiisarneq eqqartorutsigu, taava taassuma qanoq isumaqarnera sulisunut nassuiaatiginissaa pingaaartuuvoq, Henrik Sóloy oqarpoq.
Taassuma innersuussutigaa isertitsivimmut taarsiullugu inissiisarneq, ukiukinnerusunik inissiinermi pinerluuteqarsimasunut inissiisarfinnut taarsiullugu atorneqartussaq, inatsimmi allassimanngimmat, taamaammallu kommunimi sulisut ilisimasimasinnaanagu.
Qaasuitsup Kommuniata ombudsmandimit isornartorsiorneqareernermini ilaatigut suleriaatsit allanngortissimavai sulisunilu piginnaasaqarnerussutaasussanut pikkorissartikkiartortalersimallugit.
Kisianni naak ombudsmandip isornartorsiutaasa ilarpassui akuersaaraluarlugit, aamma isornartorsiutit ilaasa aaqqiivigisinnaaneri, Henrik Sóloyip qularnartoqartippai.
Assersuutigalugu Ombudsmandip pinerlussimaneq peqqutigalugu ukiukinnerusunik inissiisarnernut tunngatillugu nunatsinni kommuninut isornartorsiuinera isumaqatiginngilaa.
- Kommunini akuttunngitsumik suliassinneqartarpugut, suliassatsinnut sakkussaqartinneqarata. Taamaanneralu eqqarsarnartoqartilaarpara. Assigiinnarpaa illuliorniarluta aalajangerutta, taavalu sanasut milluaatinik tunillugit, oqarfigalugillu milluaatit atorlugit nutaanik illuliussasut. Taamaaliorneq isumaqanngilaq, Qaasuitsup Kommuniani isumaginninnermut pisortatut atorfinerlaaq, Henrik Sóloy, oqarpoq.
Taassuma assersuutigaa, ulloq unnuarlu angerlarsimaffinnik suli amigaateqarmat, aamma naak ulloq unnuarlu angerlarsimaffimmik Sisimiuni 2014-imi pilersitsisoqaraluartoq, aamma sumi sisamanut qularnaallisagartaanilu sisamanik inissalimmik. Taavalu aamma Ilaqutariinnermut Naligiissitaanermut Isumaginninnermullu Naalakkersuisoqarfimmik eqaannerusumik suleqateqarnissaq ujartorlugu. Naalakkersuisoqarfimmi suliassanik naammassinninniartarneq aamma arreeqisutut taavaa.
Ilanngullugu eqqaasinnaavarput, Henrik Sóloyp qanittukkut atorfinitsinneqarnera uunga suliamut tunngassuteqanngimmat. Isumaginninnermi taamani pisortaasoq soraarninngorluni taamaatippoq.
