Ombudsmandip kommuni inissiinngitsoorsimaneranik upissuppaa
Angummik persuttaanermi kingorna niviarsiaraq 17-inik ukiulik isertitsivimmut inissinneqarpoq. Angutip Dronning Ingridip Napparsimmavissuanut inissinneqartariaqarlersissimasaata ikini kingorna toqqutigai.
Niviarsiaraq ullut 22-it sertitsisarfimmeereerluni imminut toquppoq.
Ulluni 22-ini kommuunip suliassamik isumaginnera arriisaarunneqarpoq, naak Naalagaaffiit Peqatigiit meeqqat pisinnaatitaaffii pillugit isumaqatigiissutaanni, Nunatta ilaaffigisaani allassimangaluartoq, aatsaat allamik periarfissaqanngippat meeqqamik sivikinnerpaamik parnaarussisoqarsinnaasoq, inersimasunut immikkoortortamit avissaartillugu.
Ombudsmandip misissuisimanerani kikkut pineqarnerinik ersersitsinngitsumi, ilaatigut paasineqarpoq, kommuni niviarsiaqqap inissinneqarnissaa siunertaralugu, aatsaat ullut aqqanillit qaangiuttut ulloq unnuarlu angerlarsimaffimmut attaveqarsimasoq.
Aqaguani angerlarsimaffik akivoq inissaqartitsinani. Niviarsiararlu oqaatsit pissutigalugit Danmarkiliartinneqarsinnaanngimmat, kommuni ilaqutariinnermut, naligiissitaanermut isumaginninnermut naalakkersuisoqarfimmut saaffiginnippoq.
Naalaakersuisoqarfik inissiiffiusinnaasumik aqaguani siunnersuuteqarpoq. Ullulli tallimat qaangiuttut suli niviarsiaqqap inissinneqarfissaanik isumaqatigiissuteqartoqanngitsoq, niviarsiaraq inissiisarfimmi imminut toquppoq.
Ombudsmandip kommunip suliassamik aallussinera assorsuaq isornartoqartippaa, taamatullu sileriaaseqarsimanera naammaginanngilluinnartutut taallugu.
Sakkortuumittaaq isornartorsiorpaa, ukiukitsoq kommunip isumaginnittoqarfiani ilisimaneqareersimammat tarnikkut pissutsini pissutigalugu inooqataanermini assut ajornatorsiuteqartutut, siusinnerusukkullu imminut toqunnissaminik sioorasaarisimanera pillugu napparsimmavimmut unitsinneqarsimasutut.
Kommuni Ombudsmandimut allakkamini suliaq pillugu ajuusaaruteqarsimavoq.
Tikkuarlugulu parnaarussaaneranut atasumik ulloq unnuarlu angerlasimaffimmik naleqquttumik nassaarsinnaasimanani.
Suliap ilungersunartuunera pissutigalugu Ombudsmandip Inatsisartut inatsinut ataatsimiititaliaa Qaasuitsullu Kommunia ilisimatinniarlugit aalajangersimavoq.
Qaasuitsup Kommuniatalu Ombudsmandi nalunaarfigisimavaa sulisut sulianut taamaattunut pikkorissarniarlugit.
Ombudsmandittaaq maluginiarsimavaa kommunit arlallit pinerluttuliornernut atasumik ukiukitsut inissinneqarnissaasa suliarinissaat ilisimasakiffigigaat.
Taamaattumik kommunit pisussaaffimminnik naammassinninnissaat, ilaqutariinnermut isumaginninnermullu Naalakkersuisoqarfiup qanoq ililluni qulakkeerniarneraa nassuiaqqullugu piumasaqarsimavoq.
