Qaasuitsup Kommuniani nalunaaruteqartarneq ajornannginnerulissaaq
Maannali Qaasuitsup Kommuniata, innuttaasunut ajornannginnerusumik "nalunaarsinnaanermik" pilersitsipput. Meeqqat ajortumik pineqarsorigunikkit akuliussinnaanerannik tassani periarfissillugit.
- Misigisimaguit meeraq inuusuttorluunniit persuttaanermik, kinguaassiutigut atornerlugaanermik
imaluunniit sumiginnarneqarnermik eqqugaasoq pasitsaassimagukku - inunnik isumaginninnermik oqartussaasunut, tamatuma nalunaarutiginissaanut innuttaasutut pisussaatitaavutit, kommunip tamanna maanna erseqqissarpaa.
Paasissutissiillunilu innuttaasut qanoq iliorsinnaanerannut innersuussilluni:
- Inunnik isumaginninnermut ingerlatsivimmut sianersinnaavutit, imaluunniit allakkanik mailimilluunniit nassiussisinnaallutit. Illit ativit ilisimatitsissutiginissaa, isertuunnissaaluunniit toqqarsinnaavat, Inunnik Isumaginnernermi pisortap, Henrik Sóloyip tusagassiuutinut tamanna nalunaarutigaa.
Aamma atuaruk Angajoqqaat: Meeqqavut ikiorneqartariaqarput
Meeqqap inuusuttulluunniit aqqa, ajornanngippallu adressia, sorlermiluunniit atuartuunersoq saaffiginninnermi nalunaarutigineqarsinnaavoq. Meerarlu sinnerlugu suna aarleqqutiginerlugu tassuuna aamma nalunaarutigalugu.
Suliaq tiguneraniit kommunip namminerisaminik maleruagassaasa iluanni, akunnerit 24-t qaangiutsinnagit misissorneqalissaaq. Kommunimi sulisut sisamat tassani nalunaarsuisussat suliamillu ingerlatitseqqittartussat sulisorinissaat naatsorsuutigaat.
Kinaassutsimik isertuussilluni nalunaaruteqaat nassiunneqarsinnaavoq uunga: social@qaasuitsup.gl.
