Angajoqqaat: Meeqqavut ikiorneqartariaqarput
![](/sites/default/files/styles/image_934x467/public/article_images/qeqertarsuaq1.jpg?itok=h_0kveAQ)
Angajoqqaat meeqqatik ikiorneqarnissaat pisariaqartippaat. Annertuumik ikiorsarneqartut Kommuni nalunaarpoq.
Angajoqqaat upernaaq 2015-imili paasigamikku meeqqatik atornerlugaasimasut, pisortanut, politiinut atuarfimmullu nalunaarsimapput ikioqqullutik.
Meerarli pinerliisoq 15-it inorlugit ukioqarmat politiit suliassaq socialinut ingerlateqqissimavaat, angajoqqaalli meeqqami ikiorneqarnerat naammaginngilaat.
- Ajornartorsiutigaarput meeqqat Qeqertarsuarmi meeraqamminit atornerlugaasimasut eqqunngitsumik sullinneqarnerat pillugu, qulinik ukiulimmut angajoqqaaq kinaassutiminik isertuusiumasoq taama oqarpoq.
Aamma atuaruk Meeqqanut ambassadørit pisinnaatitaaffiit politikkikkut suliaqarnermi isumannaassavaat
Pisup kinngorna angajoqqaat kommunimiit ikiorneqarsimapput, taakku tarnip pissusaanik ilisimasalimmik nassiussisimapput, aatsaalli ukiup affaa sinnerlugu qaangiummat tamanna pivoq.
Tarnip pissusaanik ilisimasalik qaammatit tamaasa Qeqertarsuarmukartartussaavoq, novemberimi siullermik tikippoq, qaasiuinnartumilli ikiuisimasoq angajoqqaat isumaqarput, sulilu ikiorneqarnissamik pisariaqartitsillutik.
Qaasuitsup Kommuniani isumaginninnermut pisortap Henrik Sóloy-ip, Qeqertarsuarmi pisut ilisimallugit uppernarsarpaa, taassumalu oqaatigaa annertuumik ikiorlugit.
- PPR-imeersut ikiueqataapput, familiecenterimiit tarnip pissusaanik ilisimasalik qaammat ilivitsoq taakaniippoq. Aaamma Aasianniit socialrådgiverit tikisippagut. Aammattaaq atuarfik oqaloqatigisarparput, taakku angajoqqaat ataatsimeeqatigisarpaat meeqqat eqqartorlugit. Taamaamat sakkortuumik ikiorigut isumaqarpunga, Qaasuitsup kommuniani isumaginninnermut pisortaat Henrik Sóloy taama oqarpoq.
Ilinniarsimasunik amigaateqarneq
Atuarfilli meeqqat ataasiakkaat ikiorsinnanngikkaat, taamaammallu atuarfik ikiuisinnaangitsioq paasitinneqqarsimallutik angajoqqaat oqaatigaat.
Meeqqat ilaai suli ammarsimanngimmata ilinniarsimasumik pikkorissumillu meeqqatik oqaluussaqarnissat kissaatigaat. Qeqertarsuamili ilinniarsimasunik socialrådgivereqanngilaq.
- Tassa ilinniarsimasunik amigaateqarneq Kalaallit Nunaani unamminartut ilagaat, Henrik Sóloy oqarpoq.
Aamma atuaruk Meeqqanut ambassadørit pisinnaatitaaffiit politikkikkut suliaqarnermi isumannaassavaat
Angajoqqaat ataasiaannarnatik Qeqertarsuarmi atuarfimmut socialinut politiinullu saaffiginnittarsimapput. Taakkulu ikiorneqarnertik naammaginngilaat, misigisimallutillu kanngutsaatsuliortoq kisimi ikiorneqartoq.
- Pisariaqartipparput saaffiginnissutigut paasineqassasut, oqaatigeriikkattullu killormut sullinneqarnermut illuanut saatinneqassasoq. Kiisalu pisortat saaffigisimasagut pimoorullugu suliaminnik nakkutiginninnerulissasut, qulinik ukiulimmut angajoqqaaq taama oqarpoq.
Aamma atuaruk Meeqqanik annersaasarnerup inerteqqutaalernera nuannaraa
Namminersorlutik Oqartussanik angalatitat, Qitiusumik Siunnersuisarfik Saaffik, Qeqertarsuarmi angajoqqaat oqaluutereerlugit pisoq ilaqutariinnermut, naligiissitaanermut isumaginninnermullu naalakkersuisumut ingerlateqqissallugu oqarsimapput.