Qaasuitsup Kommunia aningaasanik amerlanernik uninngasuuteqarsinnaalluarpoq

Qaasuitsup Kommuniani ukioq manna aningaasanik 40 million koruuninik sipaartoqarnissaa radioaviisimi ippassaq oqaluttuaraarput.Aningaasanik taama amerlatigisunik sipaartoqarnissaa, Inuit Ataqatigiit kommunalbestyrelsemut ilaasortaatitaasa apeqquserpaat, minnerunngitsumik meeqqanut paaqqinnittarfinni inissanut, friplads-inik taaneqartartunut, aningaasat 18,6 million koruunit ukiup massuma naanerani aningaasanut missigersuutini atorneqartussatut siunertarineqarmata.

Qaasuitsup Kommuniani kommunalbetyrelse-mut ilaasortap, Ane Hansenip, Inuit Ataqatigiinnersup sipaarutissatut siunniunneqartut siullermik ima oqaasertalerpai.

- Qaasuitsup Kommuniani naatsorsuutitigut killiffia ukiut tamaasa taamaalinerani huraartuutissaaneq ajorpoq, taamaattumik Inuit Ataqatigiinniit suleqataarusuppugut, Qaasuitsup Kommuniata siunissami aningaasatigut inissisimanerata pitsaanerulernissaanut.

Ane Hansenip pingaarnertut isornartorsiorpaa, konto 40-mi, tassa meeqqerivinni inissat aalajangersimasunut naatsorsuussanut, fripladsinik taaneqartartunut, ukiup naaneranut 18,6 million koruunit atorneqarsimasussatut missigersuusiami naatsorsuutigineqarneri.

- Konto 40-mi, paaqqinnittarfinni inissanut aalajangersimasunut, fripladsinik taaneqartartunut 2012-mi aningaasat 217.000-it atorneqarsimapput ukioq mannamullu 257.000-it atugassatut missigersuummi allassimallutik. Taama allassimasoqaraluartoq naatsorsuutigineqarpoq aningaasat 12,6 million koruunit ukioq manna atorneqartussaasut, tassa 74-eriaammik qaffassimallutik. Tamassuma nassuiaatigineqarnissaa Inuit Ataqatigiinniit piumasaraarput, Ane Hansen oqarpoq.

Aamma qinikkanut aningaasartuutissat ukioq manna amerlineqartussatut missigersuusiiornermi ukiunut siuliinut naleqqiullugu amerlanerusussaapput. Tassa borgmesteri qinikkallu allat nikissinnaanerannut 28 million koruunit missigersuusiornermi naatsorsuutigineqalersimammata.

- Takuneqarsinnaavoq 2012-imi 12,5 million koruunit atorneqartussaasimagaluartut. Kommuninut qinersinerup kingorna borgmesterip ilaasortanngortullu allat nikissinnaanerannut 16 million koruunit ukioq mannamut qaffaasoqarsimavoq, takusinnaasarpulli malillugu tassa 28 million koruuninngorsimallutik. Aamma tamassuma nassuiaatigineqarnissaa kissaatigaarput. Ane Hansen, Inuit Ataqatigiit taama oqarpoq.

Qaasuitsup Kommuniani borgmesterip, Ole Dorphip Inuit Ataqatigiit qisuariaataannut oqaaseqarniarnani radioaviismut oqarpoq, taamaattorli nassuerutigaa, 2013-imut missigersuusiornermi kukkusoqarsimagunartoq. Ole Dorphip oqaatigaa kommunip missigersuusiaat maanna misissoqqissaarneqalersut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat