Qaasuitsup Kommunia akisussaannginnerarpoq
Illuni attartukkani aaqqitassat A/S INI-p akisussaaffigalugillu isumaqatigiissut naapertorlugu pisussaaffigigai, Nick Nielsen naqissusiivoq.
- Qaasuitsup Kommuniani inissiaatitta ingerlanneqarnissaannik A/S INI isumaqatigiissusiorfiginikuuvarput, taakkulu tassa ingerlatsipput, taammaattumik uagut qanoq iliuuseqarsinnaarpianngilagut, Nick Nielsen oqarpoq.
Siorapalummi illup B 583-ip, ilinniartitsisup illuata aserfallassimaqisup aaqqinneqarnissaa Qaasuitsup Kommuneanit aamma A/S INI-mit akisussaaffigineqarusunngilaq. Taava kinamita akisussaasuuva? Sanaartortitsisoq? Imaluunniit Ingerlatsisoq?
Qaasuitsup Kommunea aamma A/S INI 2009-mi aggustip aqqaneq-aappaanni toqqammaviusumik isumaqatigiissusiorput. Isumaqatigiissullu taanna ukioq manna decembarip 31-annut atuuppoq. Tassalu isumaqatigiissut taanna Qaasuitsup Kommuniata malikkaa Nick Nielsenip naqissuserpaa.
- INI-mut isumaqatigiissutigut toqqammavigalugit uagut ingerlatsivugut, INI allami toqqammaveqarsimaguni taava paasitittariaqarpaatigut suut toqqammavigalugit ingerlatsinerluni, Nick Nielsen oqarpoq.
A/S INI-mi illuutit isumagineqarnerinut pisortaq, Sven Pedersen oqarpoq, illumut pineqartumut sullissinertik iluamik ajunngitsumillu ingerlassimallugu:
- Pisoq eqqarsaatigalugu, illumut tassunga sullissinerput ajunnginnerpaamik suliariniarsimavarput, Sven Pedersen oqarpoq.
Nick Nielsenip oqarnera naapertorlugu, A/S INI isumaqatigiissummik naammassinnissimanngilaq:
- Aserfallatsaalineq aningaasartuuteqarnerlu INI-p isumagisussaavai, tassa tamanna isumaqatigiissuterput. Uagut tamanna maanna allanngortissinnaanngilarput, Qaasuitsup Kommuneani Sanaartugassanut Avatangiisinullu Ingerlatsivimmi pisortaq, Nick Nielsen taama oqarpoq.