Qaannat Kattuffiat: Pissartanngorniuunissaq suli siunertaraarput
Covid-19-imut akiuusutissalersuineq aallarteruttorpoq, akiuussutissalertikkusuttulli tamakkerlugit qaqugu kapineqarsimalernissaannik Naalakkersuisut erseqqisumik suli nalunaaruteqanngillat. Covid-19-lumi atugaatillugu Qaannamik unammersuarnissat piviusunngussanersut suli qulakkeerneqanngilaq.
Taamaakkaluartorli piviusunngortinnissaa siunertaralugu Qaannat Kattuffiat piareersarpoq.
Aasarulu pissartanngornerujumaartussat Uummannami ingerlanneqassapput.
Qaannat Kattuffiat peqatigiiffinnut taama nalunaarpoq.
Unammersuarnissat Ilulissaniittussaasutut maannamut pilersaarutaagaluarpoq. Kisianni Ilulisssani aaqqissuisussat taarsiullugu aappaagu 2022-mi pissartanngorniunnissamut aaqqissuussisuujumasimapput.
Tamatumunnga ICC-p aappaagu 2022-mi ataatsimeersuarnissaata Ilulissani pisussaanera peqqutaasoq, kattufik allappoq.
Taava unammersuarnissamik aaqqisuisuujumallutik qinnuteqartut allat, tassalu Uummannami peqatigiiffik, aaqqissuisuunissaat siulersuisuunerit aalajangerpaat.
Suli qulakkeerneqanngitsoq
Coronavirusili suli akunnattoorutagallarpoq:
- Ilisimaneqartumilli COVID 19 suli annertuumik atuuppoq. Taamaattumillu QU 2021 ingerlanneqarnissaa suli qulakkeerneqanngilaq, Qaannat Kattuffiata siulittaasua, Elias-Ole Inûsugtok’, erseqqissaavoq nangillunili:
- Taamaaattorli ingerlanneqarnissaa siunertaralugu piareersarneq aallartereerpoq.
Tassalu ilumut pissartanngorniuttoqasanersoq nalunaraluartoq, qaannat kattuffiat pilersaarusiorlunilu piareersarpoq.
