Qaanaarmiut arsaannermi GM-qataarngaartussapput

Illup iluani arsaalluni angutit pissartanngorniunnissaat Ilulissani ingerlanneqassaaq martsimi sapaatip akunnerata naanerani siullermi. Iligiit arlallit toqqaannartumik anngupput taakkulu ilagaat QNQ Qaanaameersoq.

- Illup iluani pissartanngorniunnerni Qaanaarmiut siullerpaamik peqataalerput. Taamaattumik aalajangersimavugut toqqaannartumik anngutinniarlugit pissartanngorniunnerni peqataaneq misilinniassammassuk, GBU unammersuarnermut ataatsimiititaliaani siulittaasoq Oluf Olrik oqarpoq.

Ilulissani pissartanngorniunnissamut iligiit 16-it anngutissapput peqataaniarlutillu nalunaartut 28-upput. Taamaammat peqataasussat 16-iinnanngornissaata tungaanut anngunniulluni unammeqattaartoqarpoq.

QNQ Qaanaamiit, UB-83 Upernavimmiit, Nagdlúnguak 1 aamma  I-69 1 Ilulissaniit, SAK Sisimiuniit kiisalu Eqaluk 54 Tasiusamiit toqqaannartumik anngupput.

I-69 aamma Nagdlúnguak iligiinnik arlalinnik peqataatitaqarniarput taakkuli Kugsak 45 Qasigiannguaneersoq anngunniuteqatigissavaat. Taamaattoq toqqaannartumik annguttuni arsartut aqqi Nagdlúnguup aamma I-69-ip nalunaartutigeriissavaat anngunniunnerni klubbip holdiinut allanut peqataasinnaassanngimmata.

Siusinnerusukkut unammersuartarnerni iligiit ilaasa tikissinnaajunnaarnerat takornartaanngilaq silaannakkut angallannermut sila akornusiisinnaasarmat.

- Peqataasinnaajunnaartut sanilii siulliullugit aperineqassapput GM-mut peqataasinnaanersut. Tamanna iluatsinngippat Ilulissat qanitaaneersut aperineqassapput taakkuli aamma pisinnaanngeriassappata iluliarmiut allat peqataasinnaanersut aperineqarumaarput, Oluf Olrik nassuiaavoq.

B-67  siorna pissartanngorpoq finalemi unammineq sivitsorneqareersoq Eqaluk 54 Tasiusameersoq ajugaaffigalugu.