Qaanaaq internetsikkut periarfissaluppoq
- Atuartut, pingaartumillu Qaanaami atuartut, nunanik ilisimasaqarnissaminnut, inuttullu atukkatik pillugit ilisimasaqarnissaminnut, inuunerminni ingerlariaqqinnissaminnut periarfissaminnut aporfissaqaqisunut, qanoq pisinnaasaqartiginerlutik takutissappassuk, internetsi periarfissaasariaqarpoq. Killeqartariaqanngilaq, atuarfimmimi ajoraluartumik ilaatigut taamaattoqartarpoq, Qaanaami ilinniartitsisoq, Chris Paton, oqarpoq.
Internetikkut periarfissat taassuma ilinniartitsinermini atortorujussuuvai.
- Atuartut Kalaallit Nunaanni nunanilu allani siunissami suliffissaqarniarlutik imminnut unammissagunik, pingaaruteqarpoq internetsip pisinnaasai ilisimallugillu pikkoriffigissagaat, oqarpoq.
Taamaammat Danmarkimi atuarfiit ilaannik, USA-mi ilinniarnertuunngorniarfimmik Tuluillu Nunaanni suliniaqatigiiffimmik, nammineq piumassutsiminik suleqataarusuttumik, suleqateqalersimavoq, taakkumi aqqutigalugit atuartut ilikkagaqarsinnaapput - aamma killormut: taakku sulinerminni Qaanaaq pillugu meeqqat aqqutigalugit paasisaqarsinnaapput.
Chris Paton aamma taannaavoq nittartagaliorsimasoq, tassanilu nittartakkami meeqqat ulluinnarni inuunerat oqaatsitigut, videokkut assitigullu malinnaavigineqarsinnaavoq:
- Angajoqqaat taamaalillutik malinnaasinnaapput. Aamma qatanngutaasut, immaqa Danmarkimi, Maniitsumi Qasiannguaniluunniit efterskolertut, qatanngutitik Qaanaami qanoq innersut malinnaavigisinnaavaat, Chris Paton oqarpoq, erseqqissaatigalugulu atuarfimmi imminut tatigineq internetseqarnikkut annertusisimasoq.
- Qaanaami avitseqateqarusulluta tulluusimaaruteqarlutalu taamaalilluta takutsissinnaavarput, naak Avannaarsuani atuarfeerannguamiikkaluarluta.
Internetsi pillugu annertuumik ilisimasaqarnissaq, periarfissallu qanoq atorneqarsinnaanersut, meeqqat siunissaannut aamma pingaaruteqartoq, Chris Paton isumaqarpoq.
- Silarsuaq digitaliusoq Qaanaamut anngutereerpoq. Meeqqat sapinngisamik pissarsissagunik internetsimik silassorissumik atuinissartik ilikkartariaqarpaat. Inuttummi pissutsiminnut siunissami tamakku iluaqutigisussaavaat.
Kisianni, tassami kisiannertaqaqaaq: Internet Qaanaami akisoorujussuuvoq, atornissaalu killeqaqaaq. Atuarfimmi suliassat arlallit kinguartooqqapput, internetsimi nittartakkat arlallit iserfigeqqusaanngimmata. Taamaammat politikerit itertariaqarput, atuartut - pingaartumik avinngarusimasuni - internetsimik pitsaanerusumik atuarfinni atuisinnaanissaannut periarfissiillutik.
- Paasisinnaavara internetsimiit assigiinngitsunik aallernissaq Kalaallit Nunaanni akisoorujussuusoq, ernummatigaarali, atuartuutivut internetsimik sapinngisamik atuinissaannut killilersortuassagutsigik, soorlu GU-mi efterskolemiluunniit aallartikkunik, atuaqatitaaminnut allanut naleqqiullutik pisinnaasakinnerunissaat, Chris Paton oqarpoq, taanna Qaanaamukanngikkallarami Uummannami ilinniartitsisuusimavoq.
