Qaanaami unammilligassat aaqqiiviginiarneqalersut
Qaanaammi innuttaasut imminnut kivitseqatigiinnissaat anguniarneqartoq Avannaata Kommuniani Qaanaami immikkoortortaqarfiani "Peqqinneq - Sunngiffik"-mi pisortaq Regine Mathiasen oqarpoq.
- Tassa isumaqaratta anguneqartariaqartoq. Nunaqqatigiit akisussaaqatigiikkatta ataatsimut nukiit atorlugit ikioqatigiinnissaq pilersikkusukkatsigu nunaqqativut peqatigalugit, taamaattumik taanna ingerlanniarlugu aalajangernikuuvugut, Regine Mathiasen oqarpoq.
Qaanaarmiut sumiorpaluutaat kitaamiut paasiuminaatsittarmatigit artorsaateqarluni sianerfigineqarsinnaasup Attavik 146-p saniatigut nunaqqatinit oqaloqateqarsinnaaneq naammassiniarneqarpoq.
Suliniut timitalerniarlugu Qaanaami innuttaasut novembarip arfineq-pingajuani ataatsimiissapput. Tassani imminut toquttarneq akiorniarlugu innuttaasut peqatigalugit suliniutinik aallartisaanissaq anguniarneqarpoq.
Kinguaassiuutitigut kanngutsaatsuliorfigineqarsimasut ikiornissaat siunertaavoq
Taannali kisimi suliniutigineqanngilaq. Kinguaassiuutitigut kanngutsaatsuliorfigineqarsimasut aamma iliuuseqarfigineqarnissaat siunertarineqarpoq.
- Illoqarfinni assigiinngitsuninngaanniit suleqatissarsiortassaagut soorlu assersuutigalugu kinguaassiuutitigut atornerluisimanermi nammineq misigisaqarsimasut suleqatigalugit saqqummiinerit pisassallutik, Regine Mathiasen oqarpoq.
Avannaata Kommuniata immikkoortortaq "Peqqinneq - Sunngiffik" taaguuteqartoq septembarip aallaqqaataani pilersippaa. Immikkoortoqarfik taanna illoqarfinni assigiinngitsuni pisariaqatitat aallaavigalugit suliniuteqassaaq.
