Qaanaami tunitsivik qerititsiviiaqqammat piniartut tunitsivissaaleqipput
-Akiligassarpassuit takkussuutilerpata qanoq iliussanerpugut, piniartut ilaat Uusaqqak Qujaukitsoq oqarpoq.
Juulip aggustillu qaammataat Qaanaami eqqaanilu qilalugarniarfiit pingaarnersaraat. Qilalukkat mattaanik Arctic Green Food-ip tunitsivianut tunisisinnaaneq aallarteruttortoq juulip 17-iani tunitsivimmi qerititsivik suna pinerput pissutaalluni qerititsisinnaajunnaarmat, piniartut tunisinnaajunnaarput, tunitsivimmilu sulisut arfinillit suliassaarummata angerlartiinnartariaqarsimallutik.
Qaanaami piniartut ukioq manna qernertanik 79-nik qaqortanillu qulinik qilalugartassaqarput. Mattannik tuniniaasinnaajunnaaqqagallarneq pissutaalluni aningaasarpassuarnik annaasaqassalluni piniartut ilaat Uusaqqak Qujaukitsoq oqarpoq.
-Akiligassarpassuit takkussuutilerpata qanoq iliussanerpugut, oqarpoq.
Qaanaami Arctic Green Ffood-ip qerititsivia aggustip ulluisa qulingata kingorna aaqqinneqarsinnaasasoq neriuutigalugu tunitsivimmi ulluinnarni ingerlatsisoq Sofus Alataq oqarpoq.
-Nammineerlunga qerititsivilerisinnaasunik ikiortissarsioraluarnera iluatsinngimmat, qerititsivilerisinnaasoq aggustusip qulingani tikippat iluarsineqarnissaa neriuutigaarput, Sofus Alataq oqarpoq.
Qaanaap eqqaani puisaasattorujussuusoq ilanngullugu oqaatigineqarpoq. Tuttuttassat umimmattassallu isumalluutaanerat aamma killeqarpoq. Assersuutigalugu Uusaqqak Qujaukitsoq marlunnik tuttutassaqarpoq, ataatsimillu umimmattassaqarluni.