Qaanaami qimmit perlilerput

Silap allanngorarnera sikuniaasaarneralu peqqutaallutik Qaanaami qimmit 400-500-t missaanniittut nerisassaqartinniarnerat kipiluttunarsivoq. Aaffattassiissutit amerlineqarnissaat Qaanaami KNAPP-mit maanna kaammattuutigineqalerpoq.
Allattoq Louise M. Kleemann
novembarip 14-at 2011 11:58

Qaanaami silap allanngorarnera peqqutaalluni siku suli takkutinngilaq, taamaattumik  piniartut qimmiminnik nerukkaatissaqarniarnerat kipiluttunarsivoq.

- Ukiormanna aaffattassat aqqaneq-marluk kiserngorupput, kisianni qimmit 400-500-t missaanniittut qaalertinnissaannut taakku naammanngillat, Mads Ole Kristiansen KNAPP-meersoq oqarpoq.

Taamaattumik aaffattassat 64-iusut qaffanneqarnissaat taassuma kaammattuutigaa.

- Ukiut tallimat matuma siorna novembarip qaammataa aallartiinnartoq siku takkutereertarpoq, taamaattumik piniartut qaleralinnik puisinillu nerukkaatissaminnik pisaqarnissaminnik periarfissagissaarlutik, Mads Ole Kristiansen oqarpoq.

Kisianni Qaanaami imaq ukiormanna suli qernariinnaavoq, sikulu annikitsoq illoqarfiup saavaniittoq piniartunit tamanit atorneqarsinnaanani.

- Ajornartoortoqarpoq, utaqqisinnaanngilagut, iluaqutiginerpaasatsinnik qimminik asasatsinnik naalliutitsineq nuanninngilaq, allatut ajornarsippat toqoraatitsisariaqalertussaavugut,  Mads Ole Kristiansen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq